Ang kontrobersya sa Barcelona Spain

Human sa nagkadaiyang taho nga nanggawas kalabot sa unsa gayud ang tinood nga nahitabo nila ni Rica Peralejo, Piolo Pascual ug Pokwang didto sa Barcelona Spain, mitingog na pinaagi sa column ni Manay Christy Fermin sa PangMasa, ang binuhat nga gitumbok nga maoy naka-ingon sa tanan-si Mickey Munoz, kinsa tagdumala sa The Filipino Channel didto sa Europa ug sinaligan na sa ABS-CBN sulod sa disisiete ka tuig.

Ang migawas nga taho mao nga si Muñoz maoy mibira sa mga nahisgutang mga artista aron mobalik na ngadto sa ilang gi-istaran nga hotel nga maoy naka-ingon sa kasakit ni Tina Paner nga usa sa mga producers hinungdan usab sa pag-ulbo sa kaspa ni Daisy Romualdez.

Apan matud pa ni Muñoz nga bugtong 'greet and meet" ra gayud ang ilang nasabutan ni Tina ug walay apil sa kontrata ang picture taking sa mga fans kauban sa mga artista.

Suma pa si Tina maoy nasayop tungod kay mitungtong pa sa entablado sa hotel nga gipahigayonan sa show ug miingon nga

"Huwag kayong mag-alala, dahil mamaya pagkatapos ng show, mabibigyan kayo ng pagkakataong makapagpa-picture taking, magpa-autograph, mayakap at mahalikan ang ating mga artista."

Matud pa nga nabawo og senyas si Muñoz kang Tina nga dili mahimo ang iyang gipahibawo apan gisubli pa niini ang pag-ingon nga mahimo nga magpa-picture ang fans kauban ang ilang paborito nga mga artista.

"Tina, meet and greet lang tayo, just thank your sponsors, huwag kang mangako sa kanila!" matud pa nga misinggit na si Muñoz.

Gani matud pa nga milapas pa man sa kinse minutos nga meet and greet ug dungan niini kinahanglan na nga birahon ni Muñoz ang mga artista palayo tungod kay daw mahugmak na ang entablado.

Tungod sa kahinam usab wala malikayi nga nakambrasan ang nawong ug braso ni Piolo sa usa ka fan, samtang duna usay mihawok niya nga labihan nakakupog sama nga wala nay muabot pa nga ugma.