Kung mohisgot og banda kasagaran nga mosantop sa hunahuna sa publiko mao nga ang mga sakop niini mga tiggamitan og ginadiling drugas ug naglago lang. Apan kana nga panahom karaan na kaayo, sanglit ang kasagaran sa mga nanglugwa karon nga banda, nagtigiay na usab sa ka ambongan sa ilang mga bokalista ug uban pang mga bandmates. Busa angayan nga ila-ilahon una ang matag banda una mubuhi og ngil-ad nga paghukom.
Pwes sugdan ta pagsinati ang mga miyembro sa unom ka mga banda nga nahisakop sa Zugboanong Lumad kun "Zuglu" kinsa hugot nga namalibad nga dili tinood ang mga pagtuo nga mga adis-adis ang mga mahiligon sa banda banda. Ang mga nahisgutan mao, sila si Dexter Piramide, 29, (sa bandang Significant Others), Jojo Ortega, 23 ug Viet Navarro, 24 (sa Forgotten Knights), Lloyd Bacus (sa Persona), Marwin Wenceslao, 24, (sa Barely Legal), Ansel Alexius Bermoy 18 ug Jan Jan Michael Gilos 18, (mga Born Again Christian ug miyembro sa bandang Swake), Zimjar Duhig, 20, ug Excel Rey Suaring, 23, (sa Rebirth) ug ang 16-anyos nga si Ryan Oneal Deiparine (Childz).
Giangkon nila nga masakitan gayud sila kon dunay dili maayo nga mga pagsaway o hukman sila sa publiko. Apan pong pa nila usab nga sa pikas bahin makatabang usab ang mga pagsaway aron magmalambuon, depende na kana kon unsaon pagdawat.
Pong pa nila estilo lang nila ang medyo rugged aron dunay "dating" busa wala kini magpasabot nga mga gumon sila sa drugas. Ang pagpadayag kung unsay naa sa ilang mga kasing-kasing ug huna-huna, paghatag og mensahe ug paglingaw sa katawhan maoy ilang tumong bisan pa og wala kini bugting bayad sa ilang mga kahago.
Miingon sila bisan sa mga kapakyasan ug mga kasagmuyo nga ilang gihambin apan wala gihapon sila mawad-i sa paglaom ug padayon gihapon sila nga mopadayag sa ilang sentimento ngadto sa katawhan pinaagi sa musika. Kasagaran sa miyembro sa mga banda nga nahisgutan mga tinun-an sa engineering sa nagkalain-laing unibersidad dinhi sa Sugbo. Mapasigarbohon kaayo ang grupo nga mibutyag nga suportado sila sa ilang pamilya sa ilang gikalingawan karon. Ang mga sakop sa Zuglu lain lain og estelo busa dunay mga banda nga mutukar og classic rock samtang ang uban hard rock sa kabaghoan, reggae, ethnic ug daghan pa.
Si Bimbo Baliguat kinsa maoy nag-umol sa Zuglu dinuyugan sa pipila ka mga higala, mibutyag nga sa hinapos nga bahin niining tuiga ipagawas na ang unang album sa organisasyon. Kini agig pagsaulog sa ilang unang kasumaran karong Disyembre 17. Baynte ka mga kanta nga puros orihinal ang tabangan sa hiniusang pwersa sa mga banda nga naglangkub sa Zuglu.
Sayod si Bimbo nga dili sayon kab-oton ang mao nilang laraw apan masaligon usab siya nga pinaagi sa ilang panaghugpong makabaton da kini og katumanan, sa ingon hingpit nila nga makab-ot ang ilang tumong- ang pagpalambo sa Sugbuanong musika.