Julianne Lee gitaban?

Missing in action ang beauty ni Julianne Lee, ang young actress nga contract star sa GMA-7 diin ang taho nga nahipos sa PangMasa nagkanayon nga gitaban kini sa iyang uyab nga si Ram Revilla, anak ni Sen. Ramon Revilla, Sr. nga nag-artista na usab.

Suma pa nga dugay na kining wala mopauli ngadto sa balay sa iyang inahan ug lakip ang Artist Center wala masayod hain na siya.

Kahinumduman nga apil diay unta si Julianne sa "Majika" apan usa ra ka adlaw kini nga nag-taping tungod kay misupak si Ram sa costume niini isip Umbra.

Mommy ni Juday bag-og townhouse

Usa ka town house ang giregalo ni Judy Ann Santos ngadto sa iyang Mommy Carol isip gasa alang sa nagsingabot nga Mother's Day diin tua kini mahimutang sa St. Carl Manor sa Antipolo.

Samtang nasayran sa PangMasa nga gikatakda diay unta nga mag-shooting si Juday og pelikula sa direksyon ni Maryo J. delos Reyes nga ang working title niini mao ang "Black Eye" nga adto unta gam-on sa Loboc, Bohol.

Apan hayan dili pa kini mahinayon sanglit nausab ang schedule sa taping sa "Sa Piling Mo" sa Channel 2 diin angayan unta nga nahuman na kini apan sa May 15 pa buhaton sanglit bag-o pa lamang miabot si Piolo Pascual gikan sa Amerika. Mahuman na karong Hulyo ang nahisgutan nga soap opera.

Dungan niini gipadayag sa manager ni Juday nga si Alfie Lorenzo nga makamao na karon mopili og role ang iyang manok diin siya mismo maoy nangutana kang direk Maryo unsay iyang papel sa "Black Eye."

Nasayran nga magtiayon diay sila ni Yul Servo dinhi ug kontrabida si Richard Gomez diin duna silay kissing scene apan long shot ang pagkuha unya niini.

Nasayran usab nga balig duha ka Sabado ang pagpasalida sa "Inday sa Balitaw" sa ABS-CBN diin si Juday ang bida, sanglit mao kini ang birthday presentation sa ABS-CBN alang kang Juday nga magsaulog sa iyang adlaw nga natawhan karon Mayo onse.

"Pacquiao" movie sige nag shooting

Dirediretso na ang shooting sa "Pacquiao" nga gigama ubos sa Star Cinema ug FLT Films International tungod kay gikinahanglan na nga moadto sila sa Las Vegas alang sa pipila ka mga eksena.

Hinungdan nga wala makaapil si Tirso Cruz III, sa presscon sa " I Love New York" tungod kay milarga na sila kagahapon paingon sa General Santos City alang sa shooting diin siya maoy modala sa papel isip amahan ni Jericho Rosales. Gikan sa Gensan diretso sila sa Tarlac alang sa shooting gihapon.

Samtang mahinayon usab ang shooting sa pelikula nga "Aswang," usa ka digital film nga adto himoon sa San Francisco California nga langkuban nila ni Nora Aunor, Tirso, Judy Ann Santos ug Ryan Agoncillo, sa direksyon ni Suzette Ranillo.

Usa ka higala ni Suzette mitug-an sa PangMasa nga gihuwat na lamang nga maplantsa ang schedule sa mga artista samtang gibutyag usab niya nga ang nahisgutan nga pelikula ug ang "Care Home" ni Nora gikatakda nga ibaligya ngadto sa GMA Films.