Mas nahugyaw ang mga sakop sa council sa tubag ni Marky nga aron mulungtad siya sa showbiz kinahanglan nga magmatinud-anon siya sa kanunay ug maminaw sa komentaryo sa ubang mga tawo.
Nalupig niya ang tubag ni Jackie nga kinahanglang magpabiling mapaubsanon aron mulungtad sa industriya. Samtang nabahin ang baruganan sa kadaghanan labot sa komentaryo ni direk Louie Ignacio nga si Marky na ang bag-ong 'bad boy" of the dance floor.
Matud sa uban angayan nga magmugna og bag-ong titulo tungod kay si Mark Herras na ang nabantog nga "bad boy" gawas pa dili kini maayo paminawon tungod kay buot ipasabot niini nahukasan na sa korona ang labing una nga Starstruck Ultimate Male Survivor.
Base sa tsika sa PangMasa nga walay klarong tulog sila si Jackie ug Marky sanglit tungang gabii na nahuman ang final judgement didto sa Marikina ug dihang nibalik na sila sa hotel nga ilang giistaran gisunod sila sa bagang duot sa ilang mga fans.
Ang resulta alas singko na sa buntag, sa dihang hingpit sila nga nakapahuway lakip na ang uban pang sakop sa Starstruck Batch three.
Human niini sayo nga gipaandam ang duruha ingon man sila si Iwa Moto, Gian Carlos, Janna Roxas ug Chuck Allie tungod kay dili mahimo nga ma-late sila sa ilang live guesting sa 'Sis" pagka- alas onse sa buntag.
Gikan sa Sis, diretso na usab sila sa pictorial alang sa 10th season sa 'Love to Love" diin bida si Marky ug Jackie uban usab nila ni Iwa ug Gian sa episode nga nag-ulohan og "Young at Heart."