Kini tungod kay si Joey kaniadto igo lang nga mikuyog sa iyang kanhi hinigugma nga si Angelika Ymbong kinsa pipila na ka tuig ang milabay nalakip sa cast sa TV series nga giolohan og "Maria Isabel: Sugo Ng Birhen". Kini gigama sa Sugboanong producer nga si Rey Arong ug gibitoonan sa mga artista sa Sugbo, apan gisalida usab sa tibook nasud pinaagi sa ABS-CBN. Nan wala damha ni Joey nga mosubang ang bag-ong dalan sa iyang kaugmaon sanglit niadtong mga tungora gidani siya nga mag-artista.
Sanglit lagi kay basketbolista man ug ambongan misidlak ang personalidad ni Joey ngadto sa panan-aw sa producer nga si Arong ug diha diha dayon gitanyagan siya sa papel sa kontrabida sa maong teleseries. Si sinugdanan, mibalibad unta siya kay wa man siyay plano ug wa mangandoy nga mag-artista. Apan sa katapusan, napatando ra gayud siya.
Isip unang lakang gihangyo si Joey sa producer nga ang apilyedo sa iyang inahan nga Cosep maoy iyang gamiton kay sosyal ug langyaw kaayo paminawon ang Carey. Busa Joey Cosep ang screen name sa atong bida. Sa nasayran foreigner ang amahan ni Joey nga matod pa sa iyang inahan, sakop kanhi sa US Air Force nga nadistino diha sa Lapu-Lapu City kaniadto.
Human sa una niyang TV drama nagsunod sunod na ang mga projects ni Joey sa lokal nga telebisyon.Gani, nakaapil na usab siya sa award winning TV drama sa ABS-CBN nga "For Life". Sa pagkakaron si Joey maoy kontrabida sa bag-ong teleserye nga binisaya nga gioluhan og 'Dugong Sagrado" nga gisugdan pagsalida sa Catholic Television Network(channel 47).
Samtang gipaabot nga makita si Joey sa linawas atol unya sa pormal nga paglusad sa mga bag-ong programa sa CCTN karong Marso 31 diha sa Marco Polo Hotel.
Sa pagkakaron si Joey nanimuyo sa Lapu-Lapu City ug nagduma sa iyang sari-sari store sa mga higayon nga wala siyay taping sa labing bag-o niya nga teleserye.