Relasyon ni Desiree ug Vhong kumpirmado

Nadutlan na si Alex Crisano kang Ethel Booba hinungdan nga nag-eskandalo kini kagahapon sa kadlawon didto sa Calle Juan- usa ka bar didto sa kauluhan diin gireklamo siya ngadto sa kapolisan.

Kini ang Hugyaw pangagpas ni kolumnistang Lolit Solis sa PangMasa tungod kon wala pay gugma si Alex kang Ethel ug dili pa tinood ang gikataho nilang panagbalik wala kini rason nganong mangita og gubot.

Samtang si Alex nga nahinabi sa Unang Hirit sa GMA-7 kagahapon sa buntag mipasabot nga naglagot siya tungod kay tibouk gabii siya nga nagpadala og text message kang Ethel apan wala gyud kini manumbaling.

Bisag wala niya angkona nga nagbalik na gyud sila, gipasabot ni Alex nga buot lang siya nga makig-uban sa iyang gihigugma niadtong Martes sanglit adlaw kadto sa mga kasing-kasing.

Midugang si Alex nga misurok ang iyang dugo tungod kay pag-abot niya sa Calle Juan iyang nakita si Ethel nga malipayong nagsayaw-sayaw sa ka-date niini hinungdan nga wala siya makapugong ug iyang gisukmag ang pultahan sa nahisgutan nga bar.

* * *

Kumpirmado na nga duna gyuy espesyal nga relasyon sila si Desiree del Valle ug Vhong Navarro base usab sa taho sa usa ka kasaligan nga tinubdan ni Many Lolit Solis.

Una na nabalita dinhi sa Banat Hugyaw ang maong taho apan mas gipalig-on pa ang maong taho pinaagi sa tinubdan ni Manay kinsa namahayag nga blooming as nagka-guapa karon si Desiree og maayo tungod sa pagpangga ni Vhong kaniya.

Walay buot magpa-interview sa masig ka habig sanglit puros naglikay sa intriga apan ang mga suod nila nga higala nanghinaot nga dunay maayong samputanan ang nahisgutan nga relasyon.

Sa hilom giampo usab sa mga amiga ni Desiree nga dili kini mapareha sa nahimong relasyon kaniadto tali sa nahisgutan ug kang Luis Alandy nga nimata na lang sila usa ka adlaw niini nga nawad-an na sila og gana ngadto sa usag usa.

Ang sigurado mao nga November 2005 pa nagsugod ang espesyal nga pagtinagdanay nila ni Desiree ug Vhong.