Insulto sa mga opisyal

Imbes makig-uban ni Presidente Ferdinand Marcos, Jr. ug sa mga opisyal sa Sugbo atol sa opening ceremony sa Palarong Pambansa 2024 didto sa Cebu City Sports Center niadtong Martes, Hulyo 9, mas gipili ni Bise Presidente Sara Duterte nga moduaw sa mga atleta nga nalandig sa Cebu City Medical Center (CCMC) tungod sa dengue.

Gawas sa gi-dengue nga mga atleta giduaw sab ni Duterte ang ubang pasyente labi pa ang mga bata.

Sa laktud gi-snub sa bise presidente ang opening ceremony sa Palaro.

Kini bisan pa og una na siyang mikumpirmar nga motambong sa kalihukan ug gani kabahin gyud siya sa programa isip outgoing secretary sa Department of Education. Isip ikaduhang labing taas nga opisyal sa nasud, ang pagtambong sa mga opisyal nga kalihokan sama sa Palaro apil sa iyang mga responsibilidad.

Apan ambot unsay nahitabo nga mas mipatigbabaw man ang personal nga pagbati kay sa iyang obligasyon ug katungdanan?

Tataw nga naglikay si Duterte sa presidente. Ug nakasabot ko sa personal niyang gibati human sa pagsi-ak sa gipasibantog nila niadto nga "unity".

Apan dili husto sa usa ka opisyal nga palabihon ang personal nga interest kay sa ilang katungdanan ug responsibilidad.

Di mahimong himoong rason ni Duterte ang iyang pagduaw sa CCMC hinungdan nga wa siya motambong sa opening sa Palaro tungod kay duol ra kaayo ang city hospital ug ang sports center.

Ang gihimo sa bise presidente nagpakita sa iyang "immaturity."

Ug ang mga immature nga lider maoy katapusang tawo nga gikinahanglan sa publiko.

Kun dunay plano si Duterte nga magpresidente sa sunod nga eleksiyon, ang mga opisyal sa Sugbo pinangulohan ni Gobernador Gwen Garcia maoy unang mga lider nga angayan niyang likayan nga masilo kaniya.

Kini tungod kay ang Sugbo usa sa giilang labing daghan og botante sa nasud. Gani sa miaging piniliay makabungong ang mayoriya nga gihatag sa Sugbo sa kasamtangang administrasyon.

Ug alang nako pag-snub ni Duterte sa opening sa Palaro maisip nga insulto alang sa mga opisyal sa Sugbo nga naghago pagpreparar alang sa dakong kalihukan.