EDITORYAL - Medical Marijuana Bill

Giaprubahan na sa ikatulo ug katapusang pagbasa ang Medical Marijuana Bill diha sa Ubos Balay Balauranan.

Ang maong balaudnon dugay na kaayong giduso sa nanglabay nga mga Kongreso apan pirme lang kining mapadaplin kay nakita nga dili kini prayoridad ug naa say mga pagduda nga basin maabusahan kini.

Ang House Bill 10439 o Access to Medical Cannabis Act, magtugot sa mga doktor nga magamit ang potensyal sa maong matang sa tanom sa natad sa medisina.

Ang Canabis o Marijuana adunay nagkalainlaing varieties o klase nga epektibo sa mga espesipikong sakit.

Mao nga sa ubang nasud gitugot ang pagtanom niini ug paggamit isip medisina sa mga tambalanan partikular sa mga sakit nga naglambigit sa kaugatan ug utok.

Apan estrikto ang mga patakaran nga kinahanglang sundon sa mga doktor ayha kini i reseta, kini tungod kay bisan. duna kini medikal nga kapuslanan, dili ikalimod nga kini addictive o maka addict.

Mao nga karong wa pay balaod mahitungod sa legal nga paggamit niini, ilegal pa gihapon ang pagtanom, pagbaton o paghupot, pagbaligya ug paggamit niini.

Mas maayo kun pilion lang ang mga doktor nga tugotang maka reseta niini ug monitoron ang mga supply nga gipagawas ug pundo, lakip ang pasyenteng giserestahan ug kinsa ang mga doktor nga gitugtang moreseta.

Si House Committee on Dangerous Drugs Chairperson Representative Robert Ace Barbers miklaro nga ang paggamit sa marijuana gawas sa medikal nga rason magpabiling illegal sa nasud.