Nag-shopping way bayad-bayad

CEBU, Philippines — Patay ang usa ka 9-anyos nga batang lalaki human nalumos samtang naligo sa usa ka public beach sa Sitio Bonbon, Barangay Ocaña, Carcar City alas-4:30 sa hapon niadtong Septiyembre 28.

Ang  namatay giila lamang sa alyas nga Kai, residente sa Sitio Baha-baha, Barangay Liburon, Carcar City, gidala sa Cebu Provincial Hospital-Carcar apan gideklarar nga dead on arrival.

Matud sa Carcar City Police Station, gidala ang bata sa ospital sakay sa BFP-7 Carcar Ambulance 911 uban sa mga personnel sa Coast Guard ug City Disaster Risk Reduction and Management Office (CDRRMO) sa Carcar City.

Base sa inisyal nga imbestigasyon sa kapulisan, nangayo og permiso ug gitugtan ang bata sa iyang iyaan, nga giila lamang sa alyas nga Maria aron maligo kauban sa ubang mga bata.

Miabot ang grupo sa baybayon alas-2 sa hapon ug gipahinumdoman sa iyaan ang mga bata nga dili moadto sa lawom nga bahin sa dagat  kay nag-atiman usab siya og laing bata.

Apan wala mabantayi nga niadto sa lawom nga bahin sa dagat ang bata kauban ang laing upat pa ka mga bata nga gibanabana nga 200 metros gikan sa hunasan daplin tungod sa low tide.

Samtang nagkuptanay ang mga bata, giingong nadala sila sa kusog nga sulog sa dagat ug napadung sa lawom hinungdan nga nakatibulaag ang mga bata apil na ang namatay.

Sa pagpinangitaay sa ilang mga kauban, nakuptan sa usa gikan sa ilawom ang biktima. Apan wala na kini magginhawa.

Nangayo dayon og tabang ang iyaan ug ubang mga kauban ug daling gidala sa ospital.

Matod sa kapulisan, nagtrabaho sa gawas sa nasod ang inahan sa biktima samtang ang iyang amahan nagtrabaho sa Cebu City.  IBM BANAT NEWS