LTO mopahigayon og one-stop shop sa Isla sa Camotes
CEBU, Philippines — Dad-on sa Land Transportation Office (LTO)-7 ang one-stop shop nga libreng serbisyo sa Camotes Island sa Disyembre 1 ug 2 subay sa hangyo ni Cebu Governor Pamela Baricuatro nga mapaayo ang paghatud sa serbisyo sa gobiyerno sa isla sa dili pa hingpit nga ipatuman ang mas hugot nga pagpatuman sa mga balaod sa trapiko.
Si LTO-7 Director Wendell Dinglasan nagkanayon nga ang maong kalihokan nga gipaagi sa Provincial Administrator nga si Atty. Ace Durano nagtumong sa pagsulbad sa kakulang sa duol ug dali maabot nga mga serbisyo aron dili na kinahanglang mobiyahe pa ang mga residente paingon sa mainland Cebu alang sa ilang lisensiya ug uban pa’ng rekisitos.
Ang duha ka adlaw nga kalihokan sugdan sa Lungsod sa Poro nga maglakip sa libreng Theoretical Driving Course (TDC), mobile emission testing ug serbisyong medikal.
Matud ni Dinglasan, nakuha na sa ahensiya ang pag-aproba sa ilang central office alang sa maong mga kalihokan bisan sa wala pa ang bag-ohay nga operasyon sa pagpatuman sa mga balaod sa trapiko sa Camotes.
Giila niya ang hangyo sa kagamhanan sa probinsiya nga masiguro nga adunay igong serbisyo sa LTO nga ma-access sa mga residente sa dili pa hingpit nga ipatuman ang mas hugot nga pagpatuman sa mga balaod sa trapiko. Gipasabot niya nga bisan og naghatag na ang lokal nga kagamhanan og building alang sa LTO Camotes Extension Office, kulang pa kini sa importanteng mga serbisyo sama sa medical examination, driving test ug emission testing.
Ang extension office nga sakop sa hurisdiksiyon sa LTO Danao naghatag na og tabang sa pagproseso sa lisensiya apan dili na magamit ang emission testing facility niini.
Isip temporaryong lakang, magpahigayon ang LTO og one-stop shop samtang nangita og dugang pundo aron matukod ang gikinahanglang mga pasilidad ug serbisyo sa isla.
Gibutyag ni Dinglasan nga magpadayon ang koordinasyon sa ahensiya sa mga lokal nga kagamhanan ug sa kagamhanan sa probinsiya aron madala pa ang dugang serbisyo sa Camotes sa dili pa ang Pasko. BDB BANAT NEWS
- Latest















