Wemby bumandera sa paglusot ng Spurs sa Mavs
SAN ANTONIO — Humakot si Victor Wembanyama ng mga career highs na 52 points at 24 rebounds bukod sa walong blocks para gabayan ang Spurs sa 112-111 paglusot sa Dallas Mavericks.
Naglista ang 7-foot-4 na si Wembanyama ng 29 points, 15 rebounds at limang blocks sa first half para maging unang player simula nang magsimula ang NBA play-by-play era noong 1996-1997 na nagtala ng higit sa 25 points, 10 rebounds at limang blocks sa first half.
Umiskor si Fil-Am Dylan Harper ng 21 points at nagkadena si Stephon Castle ng 17 points at 10 rebounds para sa ikaanim na sunod na ratsada ng San Antonio (6-2).
Naimintis ni Kyrie Irving, bumira ng 29 points, ang kanyang 15-foot, turnaround jumper sa natitirang tatlong segundo sa huling posesyon ng Dallas (4-4).
Nagdagdag si Naji Marshall ng 22 points para sa Mavericks at may 21 at 19 markers sina P.J. Washington at Cooper Flagg, ayon sa pagkakasunod.
Sa iba pang laro, wagi ang Philadelphia 76ers sa Detroit Pistons, 112-106; dinagit ng Atlanta Hawks ang Washington Wizards, 120-105; tinalo ng Boston Celtics ang Milwaukee Bucks, 109-102; dinaig ng Brooklyn Nets ang Charlotte Hornets, 114-104; pinatumba ng New York Knicks ang Chicago Bulls, 135-105; nirapido ng New Orleans Pelicans ang Utah Jazz sa overtime, 120-113; lusot ang Indiana Pacers sa Memphis Grizzlies, 107-103; pinapak ng Minnesota Timberwolves ang Houston Rockets, 117-107; giniba ng Denver Nuggets ang Toronto Raptors, 128-109; nanaig ang Los Angeles Lakers sa Sacramento Kings, 116-103; at sinunog ng Miami Heat ang Los Angeles Clippers sa overtime, 117-116.
- Latest
