Win No. 3 ikakasa ng Capital1 vs PLDT
MANILA, Philippines — Aminado si Vanie Gandler na nag-a-adjust pa rin sila ni Erika Santos bilang ‘Big Three’ ng Capital1 Solar Energy kasama si Bella Belen.
“It’s okay so far. I think I’ve seen so much progress with our connection throughout the games. I was struggling at the start, but then we really always make sure to communicate,” sabi ng 25-anyos na wing spiker.
Matapos matalo sa Choco Mucho Flying Titans sa kanilang unang laro ay magkasunod na pinadapa ng Solar Spikers ang Akari Chargers at ZUS Coffee Thunderbelles sa 2026 Premier Volleyball League (PVL) All-Filipino Conference Siklab leg.
Ang ikatlong sunod na panalo ang target ng Capital1 sa pagsagupa sa PLDT ngayong ala-1 ng hapon, habang magkikita ang Creamline at ZUS Coffee sa alas-6 ng gabi sa Playtime FilOil Centre sa San Juan City.
Ang unang panalo naman ang hangad ng High Speed Hitters matapos matalo sa Nxled Chameleons at Chargers.
Sina Gandler, Belen at Santos ang muling aasahan ng Capital1 kasama sina Pauline Gaston, setter Juju Coronel at rookie libero Detdet Pepito.
Babanderahan nina Fil-Canadian Savi Davison, Kim Kianna Dy, Mika Reyes, Majoy Baron, Alleiah Malaluan, Dell Palomata, setter Kim Fajardo at libero Kath Araldo ang PLDT.
Sa ikalawang laro, puntirya ng Creamline (2-0) na makasosyo ang Nxled (3-0) sa liderato sa pagharap sa ZUS Coffee (0-2).
- Latest
