41-anyos naangol sa pagkasunog sa iyang balay

CEBU, Philippines — Naangol ang usa ka 41-anyos nga babaye human masunog ang iyang balay diha sa N. Bacalso Street, Barangay Kinasang-an, Pardo, Dakbayan sa Sugbo, niadtong Sabado sa buntag, Oktubre 10.

Giila ang biktima nga si Riza Tan, nga nakaangkon og second degree burns sa iyang wala nga kamot ug first degree burn sa nawong tungod sa maong insidente.

Base sa report sa Bureau of Fire Protection (BFP), nadawat nila ang alarma pasado alas 6:03 sa buntag.  Napalong kini paglabay sa 18 minutos.

Gibanabana sa mga otoridad nga P37,000 ang kantidad sa kadaot nga nahimo sa balay. Wala nay laing nasakitan sa maong insidente.