VP Sara Duterte nihimakak sa mga alegasyon ni Gracioso

CEBU, Philippines — Gihimakak ni Vice President Sara Duterte ang mga alegasyon sa kanhi polis nga si Rodulfo Mondigo Gracioso Jr. nga gihatdan siya ug mga miyembro sa ilang pamilya og mga kwartang gipangsulod og maleta sa maong tawo.

Sa press conference ni Duterte, siya niingon nga ang gipanumpaang statement ni Gracioso ug mga interbyu sa iya sa media nga naglambigit sa iya sa kwartang gipanulod og maleta pulos bakak ug wala niya buhata ug wala siyay kasayuran bahin niini.

“Mariin kong tinatanggi ang mga pahayag ni Rodulfo Mondigo Gracioso Jr. sa kaniyang sinumpaang salaysay at mga panayam sa media na iniuugnay ako sa mga pangyayaring hindi ko ginawa, hindi ko nalalaman, o hindi ko personal na naranasan,” matud pang Duterte atol sa livestreamed press briefing kagahapon, Martes, Oktobre 6.

Matud pa sa bise presidente, iduso na sa iyang kampo ang iyahang affidavit ngadto sa mga otoridad  ugmang adlawa, Huwebes, Oktobre 8.

Si Gracioso nialegar nga nakahatud siya og kwarta kang Duterte, Davao City 1st District Rep. Paolo “Pulong” Duterte ug kanhi presidente Rodrigo Duterte ubos sa mando ni kanhi House Speaker Lord Allan Velasco. Si Gracioso maoy kanhi security aide ni Velasco sa panahon ni Digung.

Gihimakak sab ni Duterte ang pangangkon ni Gracioso nga gisugat siya niin sa usa ka pribadong hangar sa Pasay City,  ug gihatud siya niini luwan sa usa ka puti nga Ford Savanna van padung sa Diamond Hotel.

Matud pa ni VP Sara, ang Presidential Security Group maoy nagdala sa iyang seguridad sukad niadtong Hulyo 2016 hangtud Hunyo 2022 ug ang iyang mga flights anang panahona ang PSG maoy gahikay.

"Hindi kailanman nangyari na ako ay sinundo ni Gracioso sa isang private hangar sa Pasay, sumakay sa isang Ford Savanna White na artista van at hinatid sa Diamond Hotel," matud pa sa bise presidente.

Matud pa sa bise presidente, wala siyay sakyanang parehas ana ug wala say record nga nibisita siya sa Diamond Hotel.

Matud pang Duterte nganong kang Gracioso man siya makigestorya nga makadirekta man siya og tawag kang Lord ug asawa niini nga si Rowena “Wen” Velasco.

Gihimakak sad niyang hilig siya og Royce Chocolate kay tagsa ra siya mokaon og tam-is kay naa siyay diabetes.

Iyaha sab gihimakak ang pasangil ni Gracioso nga ang kanhi Davao City chief information officer nga si Jefry Tupas iyahang personal aide nga maoy nidawat sa cash para sa iya.

Pero gatuo si VP Sara nga giapil ni Gracioso si Tupas kay nasaypan tingali niini ang naulahi nga sinaligan kay pirme silang magkuyog sa mga events. Matud niya nga gitarget si Tupas tungod sa homophobia. Gihimakak sad niya nga nanag-iya siya og Hermes bag o  Patek Philippe nga relo.

Mipakita si Duterte og mg hulagway sa iyang mga kalihokan pagpamatuod nga dili tinuod ang mga alegasyon ni Gracioso atong Abril 2019.

Matud niya didto siya sa Davao City tungod kay birthday sa iyang mama atong Abril 14,  nga gisundan og campaign rallies sa Mati ug Tagum pagka Abril 15, Digos sa Abril 16, Koronadal ug Tacurong sa Abril 17.

Didto siya sa Island Buenavista tibuok Abril 18 hangtud 20 una pa siya nitambong sa Easter Egg Hunt sa Davao City atong Abril 21.

Daghang gipakitang mga hulagway si VP Duterte sa mga lugar nga iyang giadto gikan Abril 22 hangtud Abril 25.

Iyaha sab gihimaka nga kaila sila ni Ramil Madriaga, nga nagpailang kanhi aide ug bagman sa bise presidente.

“Kung kunyaring totoo ang maleta na may P20 million na binigay kay Ramil Madriaga, sa bahay ko pa mismo, nakakapagtaka na hindi ito binanggit ni Madriaga,” dugang pa niya.

Ang National Bureau of Investigation  padayun pa karon nga gaimbestigar sa mga alegasyon ni Gracioso.

Matud pang NBI Director Melvin Matibag gi- validate karon sa mga ahente ang pangangkon ni Garcioso basi sa mga records ug uban pang pamaagi kay wala lang sila gasalig sa lie detector test result ni Gracioso.

Sa pagkakaron, nasuta na sa NBI nga duha sa mga gitawag ni Gracioso nga mga “cash houses” gipanag-iya sa mga Velasco. Gisusi na sab ang mga negosyo, corporate, tax and financial records sa mga properties sa magtiayon.

Una nang gipanghimakak sa mga Velasco pinaagi sa ilang mga abogado ang mga alegasyon ni Gracioso.— Gikan sa Philstar.com/IBM BANAT NEWS