Krimen sa CV nikunhod og 16.51 porsiyento

CEBU, Philippines — Mikubos og 16.51 porsyento ang total crime incidents sa Central Visayas niadtong Septiyembre 2026, diin 2,448 ka kaso ang natala kumpara sa 2,932 ka kaso niadtong Agosto o 484 ka kaso nga pagkunhod.

Sumala pa sa Police Regional Office 7 (PRO7), kaning pagkunhod sa krimen resulta ni sa mas gipakusgang operasyon batok sa krimen, mas kanunay nga police visibility ug mas hugot nga koordinasyon sa mga local government units (LGUs), partner agencies ug mga komunidad.

Mikunhod og 21.84 porsyento ang walo ka focus crimes, gikan sa 206 ka kaso niadtong Agosto ngadto sa 161 ka kaso sa Septiyembre, o 45 ka kaso nga pagkunhod.

Lakip sa mga mikunhod ang murder nga niubos og 45 porsyento, gikan sa 20 ngadto sa 11 ka kaso. Ang physical injury mikunhod og 34.09 porsyento, gikan sa 44 ngadto sa 29 ka kaso.

Mikunhod usab ang robbery og 38.10 porsyento, gikan sa 21 ngadto sa 13 ka kaso, samtang ang rape niubos og 23.81 porsyento, gikan sa 21 ngadto sa 16 ka kaso.

Ang theft mikunhod og 7.06 porsyento, gikan sa 85 ngadto sa 79 ka kaso. Ang motorcycle carnapping mikunhod usab og 33.33 porsyento, gikan sa unom ngadto sa upat ka kaso.

Wala nay natala nga motor vehicle carnapping sa Septiyembre kumpara sa duha ka kaso niadtong Agosto, o 100 porsyentong pagkunhod.

Apan, misaka ang homicide og 28.57 porsyento, gikan sa pito ngadto sa siyam ka kaso.

Matud ni PRO7 Regional Director PBGen Arnold E. Abad, ang pagkunhod sa krimen resulta sa paningkamot sa mga police personnel ug ilang mga partner sa pagpanalipod sa mga komunidad.

Gipasalamatan ni Abad ang mga polis nga padayong nagtrabaho matag adlaw aron mapanalipdan ang publiko.

Matud pa niya, importante ang pakigtambayayong sa mga LGU, partner agencies ug mga komunidad aron mapadayon ang kaluwasan sa Central Visayas.

Sa Septiyembre, nakarekord usab ang PRO7 og 1,940 ka pagdakop isip kabahin sa kampanya batok sa krimen. Lakip niini ang 725 ka pagdakop tungod sa illegal drugs, 633 sa illegal gambling, 112 sa loose firearms ug 470 ka wanted persons.

Mikunhod usab ang Public Safety Indicator tungod sa mas gipakusgang pagpatuman sa mga balaod sa trapiko ug mas hugot nga koordinasyon sa mga LGU ug partner agencies sa mga problema sa trapiko.

Aron mapadayon ang pagkunhod sa krimen, magpadayon ang PRO7 sa “Safer Region” initiative, pag-ila ug pagmonitor sa repeat offenders, koordinasyon sa mga silingang police stations ug pagpatuman sa mga espesyal nga balaod.

Gidasig usab ang padayong suporta sa mga LGU, partner agencies ug mga komunidad aron mapadayon ang mga nakab-ot sa PRO7 ug mas mapaayo pa ang seguridad sa Central Visayas. (BANAT NEWS)