Amerikanong wanted dinampot ng BI

MANILA, Philippines — Inaresto ng Bureau of Immigration (BI) ang isang Amerikanong mamamayan sa Cebu na pinaghahanap ng mga awtoridad ng US para sa kasong seks­wal na pagkakasala sa Mississippi.

Kinilala ng bureau ang naarestong pugante na si John Raymond Fenty, 62-anyos, na nahuli nitong Huwebes sa Barangay Buaya, Lapu-Lapu City, Cebu.

Hinuli si Fenty sa kahilingan ng gobyerno ng Estados Unidos sa pamamagitan ng Embahada ng Estados Unidos sa Maynila, na siyang nagpabatid sa mga awtoridad ng Pilipinas tungkol sa kanyang presensya sa bansa.

Ipinaalam ng criminal investigation unit ng Embahada sa BI na si Fenty ay pinaghahanap upang humarap sa korte ng hustisya sa Kemper County, Mississippi, kung saan siya ay kinasuhan ng sexual battery laban sa isang taong may depekto sa pag-iisip, may kapansanan sa pag-iisip, o walang magawa sa pisikal.

Huling dumating si Fenty sa Pilipinas bilang turista noong Hulyo 21, 2026, at kasunod nito ay nag-aplay para sa extension ng kanyang awtorisadong pananatili hanggang Nobyembre 18, 2026.

Ide-deport si Fenty sa oras na maglabas ng kaukulang deportation order ang BI Board of Commissioners.
Isasama rin siya sa blacklist ng Bureau at hindi na maaaring makapasok muli sa Pilipinas dahil sa mga kadahilanang hindi kanais-nais.

Pansamantalang nakakulong si Fenty sa tanggapan ng National Bureau of Investigation (NBI) sa Mandaue City habang inililipat sa BI Warden’s Facility sa Bicutan, Taguig City.