Pinoy athletes inaalat pa rin sa gold
MANILA, Philippines — Matapos ang dalawang gold medals ni gymnast Carlos Edriel Yulo ay hirap na itong masundan ng iba pang miyembro ng Team Philippines sa 20th Asian Games kahapon sa Aichi-Nagoya, Japan.
Muling kumuha ng dalawang bronze medals ang delegasyon mula sa sepak takraw men’s team regu nina Jason Huerte, Glindel Phori, Jom Lerry Rafael, Reynaldo Asilum Jr. at Ronsited Gabayeron at sa SIBOL Honor of Kings squad sa esports.
Talo ang mga Pinoy takraw players sa Malaysia sa semifinals, 1-2, para makuntento sa bronze.
Nakatiyak ng silver ang women’s double team nina Nelly Jay Salon, Jean Marie Sucalit at Abegail Sinogbuhan matapos daigin ang Laos, 15–12, 15–10, sa semis papasok sa finals.
Haharapin ng tropa ang Vietnam na sumibak sa South Korea sa semis, 15-6, 15-13, para sa gold.
Bigo rin ang SIBOL team sa China, 0-2, sa kanilang semis match sa Honor of Kings event para magkasya sa tansong medalya.
Unang naka-tanso ang SIBOL squad sa Pokémon UNITE event noong Linggo.
May 10 bronzes ngayon ang Pilipinas sa Aichi-Nagoya Asiad bukod sa dalawang golds ni Yulo at tig-isang silver ni mixed martial arts fighter Jean Claude Saclag at ng Gilas Pilipinas Women 3x3 team para upuan ang No. 16 spot sa medal tally.
Sa boxing, sumeguro ng tanso si Carlo Paalam via split decision win kay Jiamao Zhang ng China papasok sa semis ng men’s 55kg.
Sibak naman si Nesthy Petecio kay Chinese Yang Chengyu, 0-5, sa women’s 60kg quarterfinals.
Sa lawn tennis, dinomina ni World No. 18 Alex Eala si Patcharin Cheapchandej ng Thailand, 6-1, 6-0, sa women’s singles second round patungo sa quarterfinals para harapin si Joanna Garland ng Chinese-Taipei.
Pasok sa Round of 16 ng women’s doubles sina Tenny Madis at Stefi Aludo mula sa 6-3, 7-6 (4) pagtakas kina Anjali Junarto at Meydiana Reinnamah ng Indonesia.
Sa athletics, papagitna si pole vaulter EJ Obiena ngayong hapon, habang sumampa sa finals ang national mixed 4x100m relay team nina Anfernee Lopena, Kristina Knott, Neil Catral at Jessica Laurance (41.92).
Pang-11 si Janry Ubas sa men’s long jump finals sa kanyang lundag na 7.39m.
Sa women’s beach volleyball, hahataw sa quarterfinals sina Alas Pilipinas duo Sisi Rondina at Bernadeth Pons at tandem nina Khylem Progella at Sofiah Pagara mula sa pagwalis sa Japan at Hong Kong, 2-0, ayon sa pagkakasunod.
Sa men’s indoor volleyball, talo ang Alas Pilipinas Men sa China, 21-25, 20-25, 22-25, para sa 0-2 record sa Pool D.
Makikipagtuos ang mga Pinoy spikers sa Chinese Taipei ngayong alas-12 ng tanghali sa pagtiklop ng group stage.
Sa surfing, lalangoy sina Jayuard Alciso, Toby Espejon at Juralyn Espanola sa shortboard quarterfinals.
Sa shooting, tumapos si Franchette Shayne Quiroz sa No. 35 spot sa qualification ng women’s individual 25m pistol.
- Latest
