Mga iskul sa Parañaque nilagyan ng metal detectors

MANILA, Philippines — Inilunsad ni Mayor Edwin L. Olivarez ­nitong Biyernes ang paggamit ng walkthrough metal detectors sa mga pampublikong paaralan sa Parañaque City upang matiyak ang kaligtasan ng mga mag-aaral, sa gitna ng mga insidente ng pamamaril at pananak­sak sa mga paaralan sa iba’t ibang bahagi ng bansa.

Nauna rito, nagkabit ang Pamahalaang Lungsod ng mga closed-circuit television (CCTV) ­camera sa mga bakuran ng paaralan at nagtalaga ng mga miyembro ng Civil Security Unit sa iba’t ibang campus upang ipa­tupad ang seguridad kasama ang mga guwardiya at opisyal ng paaralan.

Kabuuang 16 na walkthrough metal detector, tatlo ang inilagay sa Para­ñaque National High School Main, habang tig-iisa sa Don Bosco High School, PNHS Senior High School, Moonwalk National High School, Sun Valley National High School, Dr. Arcadio Santos National High School, Masville National High School, Masville Senior High School, Parañaque Science High School, Tambo National High School, Marcelo Green National High School, Don Galo National High School, Sto. Niño National High School, at San Antonio National High School.

Ang susunod na batch ng mga scanner ay ikakabit sa pagitan ng Oktubre at Nobyembre, ayon kay Dolly Villar, pinuno ng Parañaque Local School Board.

Nanawagan si Olivarez sa mga pribadong high school at elementarya na maglagay din ng walkthrough metal detector sa kanilang mga campus.