LTFRB hirit na i-exempt sa election ban ang transport programs
MANILA, Philippines — Humihirit ang Land Transportation Franchising and Regulatory Board (LTFRB) sa Commission on Elections (Comelec) na i-exempt sa election ban ang paglalabas ng pondo para sa mga pangunahing programa ng gobyerno sa transportasyon.
Kabilang dito ang Service Contracting Program, EDSA Busway Extension and Love Bus “Libreng Sakay,” Fuel Subsidy Program, kabilang ang one-time fuel subsidy at P12 kada litro na fuel discount, at Public Transport Modernization Program (PTMP).
Sa liham ni acting LTFRB Chairman Atty. Greg G. Pua Jr. kay Comelec Chairman George Erwin M. Garcia, sinabi nitong hindi election-related o partisan ang mga programa dahil ipinatutupad ang mga ito alinsunod sa umiiral na batas, pondo at mga alituntunin ng pamahalaan. Layunin din umano ng mga ito na matiyak ang tuluy-tuloy, ligtas at abot-kayang pampublikong transportasyon.
Ayon kay Pua, maaaring maapektuhan ang publiko at sektor ng transportasyon kapag napahinto ang mga programa. Tiniyak naman ng LTFRB na ipatutupad ang mga ito sa ilalim ng mahigpit na eligibility, dokumentasyon, validation, accounting at auditing rules, at walang magiging pakikilahok ang mga kandidato o partidong pulitikal.
- Latest
