Kalidad sa hangin sa Metro Cebu “fair” na

CEBU, Philippines — Niayo ang kalidad sa hangin sa Metro Cebu gikan sa “very unhealthy” niadtong Septiyembre 1, 2026 ngadto sa “fair” niadtong Septiyembre 16 matud sa Environmental Management Bureau Region (EMB)-7.

Kagahapon sa alas 7:00 sa buntag ang Metro Cebu nakatala og Air Quality Index (AQI) nga 57 nga giklasipikar nga “fair”, samtang ang Barangay Cabitoonan monitoring station sa Dakbayan sa Toledo nakatala og AQI nga 17, o “good”.

Niadtong Septiyembre 1, ang AQI sa Metro Cebu niabot sa 173 o “very unhealthy” ug nisaka pa kini ngadto sa 208 niadtong Septiyembre 2, 2026 ug niabot sa 251 niadtong Septiyembre 3, ang pinakataas nga natala sulod sa Septiyembre 1 hangtud sa 16.

Human niini, hinay-hinay nga niubos ang AQI bisan nagpabiling “unhealthy for sensitive groups” hangtud sa Septiyembre 9.

Niadtong Septiyembre 10, miubos kini sa 86 o “fair”, apan nisaka pag-usab ngadto sa 154 niadtong Septiyembre 12.

Nisubli ang pag-ayo sa mosunod nga mga adlaw gikan sa 84 niadtong Septiyembre 13, ngadto sa 73 sa Septiyembre 14, dayon 78 sa Septiyembre 15 ug 57 sa Septiyembre 16.

Ang AQI nga 57 nagpakita og 116-point o mga 67 porsyentong pag-ayo kompara sa 173 niadtong Septiyembre 1.

Sa Dakbayan sa Toledo, ang AQI sa Cabitoonan niubos usab gikan sa 113 o “unhealthy for sensitive groups” niadtong Septiyembre 4 ngadto sa 17 o “good” niadtong Septiyembre 16.

Padayon nga gi-monitor sa EMB-7 ang kalidad sa hangin tungod sa haze nga nakaapekto sa rehiyon nga kaniadto naglambigit sa transboundary smoke ug fine particulate matter gikan sa wildfires sa Indonesia.

Gipahinumdoman sa EMB-7 ang publiko nga kanunay’ng susihon ang opisyal nga air quality updates ug mag-amping kong mosaka pag-usab ang lebel sa polusyon.