Cebu City nihatag og P8.7 milyon nga hinabang sa norte

CEBU, Philippines — Gihatag na sa Kagamhanan sa Dakbayan sa Sugbo ang ?8,730,185.22 nga tabang pinansyal ngadto sa mga lungsod sa amihanang bahin sa Sugbu nga naapektuhan sa magnitude 6.9 nga linog niadtong Setyembre 30, 2025.

Sa report sa Cebu City News, ang pag turnover sa ayuda gihimo niadtong Miyerkules, Setyembre 10, 2026 kun diin personal nga gipanguluhan ni Mayor Nestor Archival ug Bise Mayor Tomas Osmeña base sa gidak-on sa kadaot nga ilang nasinati.

Ang kantidad nga P8,730,185.22 naggikan sa P4,365,092.61 nga donasyon sa mga pribadong indibidwal, grupo ug organisasyon nga gidoble sa kagamhanan isip pagtuman sa saad nga tugbangan ang tanang natigom nga donasyon alang sa mga biktima sa linog.

Gipahatud ang P1,571,433.34 ngadto sa Bogo City nga mao ang sentro sa linog.  Ang P1,396,829.64 nadawat sa mga lungsod sa Daanbantayan ug San Remigio, samtang P1,309,527.78 ang gihatag sa Medellin.

Nakadawat usab ang Sogod og P960,320.38 ug P436,509.26 alang sa Catmon ug Tabuelan samtang tagsa ka P611,112.96 ang nadawat sa mga lungsod sa Borbon ug Tabogon.

Mapasalamaton si Archival sa tanang mga nidonar ug mitampo og tabang alang sa mga biktima aron makatabang sa pagbangon gikan sa nasinating katalagman. — IBM BANAT NEWS