EDITORYAL - Kaalyadong bansa, kailangan ng Pinas

IPINATUPAD noong Agosto 22 ang Acquisition and Cross-Servicing Agreement (ACSA), sa pagitan ng Pilipinas at Japan. Dahil dito, lalong tumibay ang ugnayang militar ng dalawang bansa. Ang agreement ay nagbibigay-daan sa sandatahang lakas ng dalawang bansa na magpalitan ng logistical support sa kanilang mga aktibidad.

Sa ilalim ng kasunduan, maaaring magbigay ang magkabilang panig ng fuel, pagkain, tubig, transportasyon, maintenance, communications, storage at iba pang serbisyo. Maaari din itong gamitin sa joint exercises at humanitarian at disaster response operations.

Hindi ito mutual defense treaty, pero mahalagang hakbang sa mabilis na lumalalim na defense partnership ng Pilipinas at Japan. Mayroon na ring Reciprocal Access Agreement o RAA na nagpapahintulot sa kanilang mga puwersa na magsagawa ng cooperative activities sa teritoryo ng isa’t isa.

Nagbibigay naman ngayon ang ACSA ng logistical framework para mas madaling maisagawa ang mga aktibidad na iyon.

May malinaw na dahilan kung bakit kailangan ng Pilipinas ang ganitong partnership.

Patuloy ang tensiyon sa West Philippine Sea, kung saan may matagal nang sigalot ang Pilipinas at China. Maraming beses nang binangga ng China Coast Guard ang mga barko ng Pilipinas. Binobomba rin ng tubig ng CCG ang PCG.

Ang Japan naman ay may sariling maritime dispute sa China sa East China Sea. Pareho ring naninindigan ang Pilipinas at Japan sa freedom of navigation at pagsunod sa international law.

Sa ganitong sitwasyon, makatwirang magkaroon ang Pilipinas ng mga kakampi na makatutulong sa pagpapalakas ng depensa at isa nga rito ang Japan.

Pero dapat malinaw din ang layunin: ang partnership ay dapat nagpapalakas sa kakayahan ng Pilipinas, hindi lumilikha ng permanenteng pagdepende sa ibang bansa.

Malaki na ang naitutulong ng Japan. Nagbigay ito ng patrol vessels, radar systems at training support sa AFP. May P350 milyon ding security assistance para sa mga pasilidad na magpapahusay sa maritime capabilities ng Philippine Navy.

Magandang tulong ang mga ito, pero dapat sabayan ng sariling investment sa kagamitan, teknolohiya, intelligence, personnel at defense industry. Ang bawat defense agreement ay dapat magpalakas sa kakayahan ng Pilipinas na tumindig sa sariling mga paa, hindi gawing mas dependent sa ibang bansa.