13-anyos natuok sa pisi sa baboy

CEBU, Philippines — Nakabsan sa kinabuhi ang 13-anyos nga batang lalaki human siya makit-an nga walay panimuot sulod sa ilang baboyan pasado alas-11 sa buntag niadtong Sabado, Septembre 5.

Sa inisyal nga imbestigasyon sa Danao City Police Station, gisugo ang bata sa iyang amahan para bantayan ang ilang anay nga baboy sulod sa tangkal aron dili matumban ug madat-ugan ang mga bag-ohay pang gipanganak nga mga baktin.

Niadtong higayona, busy ang iyang amahan sa sulod sa ilang balay kay nagtahi kini og pangtabon sa tangkal aron naay mapasilongan ang mga baboy.

Apan pipila lang ka minuto ang milabay, nadungog sa amahan ang paghilak sa mga baktin.

Gisugo niini ang iyang 11-anyos nga anak nga lalaki aron susihon ang iyang maguwang diha sa baboyan, apan wala niya makita ang bata. Tungod niini, dungan silang nangita sa palibot hangtod nga nadiskubrehan sa manghud ang maguwang naghigda ug wala nay panimuot sa ngilit nga bahin sa tangkal.

Ang liog niini nalambod sa pisi sa anay nilang baboy.Nangayo dayon og tabang ang manghud sa ilang silingan ug gidala sa dayun sa Cebu Provincial Hospital–Danao apan gideklarar siyang Dead on Arrival (DOA) sa attending physician.

Gisugyot sa kapolisan nga ipaubos sa autopsy examination ang lawas sa bata aron matino ang eksaktong hinungdan sa iyang pagkamatay. — /IBM (BANAT NEWS)