Olympic spot puntirya rin ng Team Philippines sa Asiad

MANILA, Philippines —  Bukod sa pagkolekta sa medalya sa 20th Asian Games sa Aichi-Nagoya sa Japan, nakatutok din ang ilang miyembro ng Team Philippines sa tiket para sa 2028 Olympic Games sa Los Angeles, USA.

Kabilang sa mga naghahangad na makalaro sa 2028 LA Olympics ay ang mga atleta ng lawn tennis, archery, squash at surfing.

Ang mga tennis singles champions sa men’s at women’s events ay maa­aring makakuha ng Olympic qualification quotas, ngunit kailangan nilang makamit ang kinakaila­ngang ranking criteria.

Babanderahan ni Pinay tennis sensation Alex Eala ang national team kasama sina Shaira Rivera, Tenny Madis at Stefi Aludo sa women’s division, habang tanging si doubles specialist Niño Alcantara ang lalaro sa men’s event.

Sa archery, ang gold at silver medalists sa individual recurve at gold winner sa recurve mixed team at compound mixed team ang puwedeng makakuha ng Olympic quotas.

Ang magkakampeon naman sa men’s at wo­men’s singles sa squash ang mabibigyan ng Olympic berth.

Sa surfing, ang highest-ranked sa men’s at wo­men’s division ang makakapitas ng continental slot para sa 2028 LA Olympics.

Sa 2024 Olympics sa Paris, France ay nag-uwi si gymnast Carlos Edriel Yulo ng dalawang gold medals sa men’s floor exercise at vault events, habang may tig-isang bronze sina Pinay boxers Aira Villegas (women’s 50kg/flyweight) at Nesthy Petecio (wo­men’s 57kg/featherweight).