Drug bust sa Naga, usa nadakpan
CEBU, Philippines — Mokabat sa P380,120 nga kantidad sa gituohang shabu ang nasakmit sa kapulisan atol sa buy-bust operation sa Barangay Langtad, dakbayan sa Naga niadtong Biyernes sa hapon, Sept. 4, 2026, diin usa ka giila nga high-value individual (HVI) ang nadakpan. Gibanabanang 55.82 gramos sa gituohang shabu ang narekober sa 45-anyos nga suspek, usa ka residente sa maong barangay. Nadakpan ang suspek human kini giingong nakigtransaksyon og shabu sa police poseur-buyer. Narekober usab gikan kaniya ang 12 ka heat-sealed transparent plastic sachets nga adunay puti nga kristal nga substansiya nga gituohang shabu. Ang operasyon gipahigayon sa mga personnel sa City of Naga Police Station–City Drug Enforcement Unit (CDEU). Gisaksihan ang buy-bust sa mga representante sa Department of Justice ug usa ka napiling opisyal sa Barangay Langtad.
Base sa inisyal nga impormasyon sa kapulisan, giingong gikan sa usa ka tawo sa San Fernando, Cebu ang suplay sa suspek, nga iyang giputos pag-usab ug gibaligya sa iyang mga regular nga kliyente aron makaganansiya.
Atubangon sa suspek ang kasong paglapas sa Sections 5 ug 11, Article II sa Republic Act No. 9165 o Comprehensive Dangerous Drugs Act of 2002. Gikustodiya karon ang suspek sa custodial facility sa City of Naga Police Station samtang giandam ang mga dokumento alang sa pagsang-at sa tukmang reklamo sa Prosecutor’s Office. Gipasalig ni Cebu Police Provincial Office (CPPO) Provincial Director PCOL Abubakar Udang Mangelen Jr. nga ipadayon ang gipakusgang kampanya batok sa ilegal nga droga ug ang paggukod sa mga nalambigit sa pag-apud-apod niini. (BANAT NEWS)a
- Latest
