Jollibee mo-dawat og seniors

Mas daghang oportunidad nga makatrabaho ang mga kwalipikadong senior citizens ug Persons with Disabilities (PWDs) sa Dakbayan sa Sugbo human gipirmahan sa kagamhanan ug Jollibee Foods Corporation (JFC) ang Memorandum of Agreement (MOA) ang alang sa pagpatuman sa Inclusive Employment Program. Ang nipirma sa MOA mao sila si Mayor Nestor Archival ug Ruth Angeles kinsa Chief Human Resources Officer sa Jollibee Foods Corporation Philippines ug HR Head sa Jollibee International. Nitambong sab sa pinirmahay ang Department of Social Welfare and Services (DSWS), Department of Welfare and Urban Poor (DWUP), Cebu City Medical Center (CCMC), Office for Senior Citizens’ Affairs (OSCA) ug mga representante sa participating brand nga gilangkuban sa Jollibee, Chowking, Greenwich, ug Burger King.

Tumong sa maong programa ang mahatagan og kahigayunan ang mga kwalipikadong senior citizen ug PWD nga makatrabaho ug magpabiling aktibo bisan pa man sa pangidaron ug sa ilang kahimtang. Mapasalamaton si Archival sa Jollibee Foods Corporation tungod sa pag-uyon sa kolaborasyon tali sa kagamhanan. Alang kang Archival, dili lang kutob sa ayuda ang mahatag sa kagamhanan apan dako kini og pag-atiman sa mga senior citizens ug PWD sa syudad aron nga makahigayon pa og paghatag og matampo sa komunidad. — Preciosa L. Bacalso/IBM