Usir nagliyab sa Head to Head PHILRACOM race

MANILA, Philippines — Nasilayan ng mga karerista ang husay sa rematehan ng Usir matapos nitong manalo sa ‘Head to Head’ (1 on 1) Win Event (3 & 6) - PHILRACOM Rating Based Handicapping System na nilarga sa pista ng Philippine Jockey Club sa Padre Garcia, Batangas kahapon.

Mabagal na sinimulan ng Usir ang kanyang arangkada dahil kulelat ito sa kaagahan ng laban habang nagpupukpukan sa unahan ang Manila De Bay at Windfall nasa tersero naman ang Generative.

Pagdating sa kalagitnaan ng karera ay halos magkakapanabayan sa unahan ang Manila De Bay, Windfall, Generative, Daily Burn, Frugality at Sky Warrior at tanging ang Usir ang nag-iisa sa hulihan ng may limang kabayo ang agwat.

Pagdating sa far turn ay naglulutsahan sa una­han ang Manila De Bay, Windfall at Frugality na nasa bandang labas habang lumalapit naman sa kanila ang liyamadong Usir.

Nagsigawan ang mga karerista nang makitang malakas na rumeremate ang Usir sa gitna pa ito dumaan sa pasapit ng hu­ling kurbada kaya naging mainit ang bakbakan sa rektahan.

Umagaw ng bandera ang Frugality sa rektahan pero lumiliyab ang Usir at lumampas ito pagd­ating sa huling 50 metro ng karera at tawirin ang meta ng may dalawang kabayo ang layo sa segundang Fruga­lity at tersero ang Generative.