Porsche ni Derek Ramsay isusubasta - BOC
Hindi nagbayad ng tax
MANILA, Philippines — Isusubasta ng Bureau of Customs (BOC) ang Porsche 918 Spyder na pag-aari ng aktor na si Derek Ramsay matapos matuklasang ilegal umano ang pagkakapasok nito sa bansa.
Sa isang pulong balitaan, sinabi ni Customs Commissioner Ariel Nepomuceno na iisyuhan nila ng warrant of seizure and detention ang sasakyan at itatakda ang pagsusubasta.
Lumilitaw na ang nasabing supercar ay in-import sa Pilipinas noong 2021 at nagkakahalaga sa pagitan ng P50 milyon at P100 milyon ngunit idineklara ito sa BOC bilang isang Porsche Boxster na nagkakahalaga lamang ng P10 milyon kaya nasa P1.8 milyon lamang ang binayarang tax.
Dahil dito, sinabi ng customs chief na kakasuhan nila ang importer, shipper, at consignee ng imported na sasakyan, gayundin ang Customs officer na humawak ng deklarasyon nito. Natukoy na nila ang importer ng sasakyan na isang kumpanya mula sa United Arab Emirates habang ang shipper naman ay ang Emirates National General Trade. Ang consignee umano nito ay ang Tobirama Enterprises at ang BOC officer na nangasiwa sa importasyon ay natukoy sa pangalang Richard Singh Colasco.
Sinabi naman ni Land Transportation Office (LTO) Chief Markus Lacanilao na papanagutin nila ang LTO personnel na nagrehistro ng Porsche 918 Spyder. Nakakuha ng mga dokumento at rehistro ang sasakyan kahit may nakitang problema sa deklarasyon nito sa Customs.
Nilinaw naman ni Ramsay na hindi siya ang nag-import ng sasakyan at binili niya ito apat na taon na ang nakalilipas mula sa isang nagngangalang Jhon Lee ng JWorks na nagsabing nabayaran na ang mga buwis at iba pang kaukulang obligasyon para sa sasakyan.
Iginiit ng aktor na binili niya ang Porsche nang “in good faith” at naniniwalang maayos at kumpleto ang mga dokumento at rehistro nito.
- Latest
