EDITORYAL — Banat News, 32-anyos na!

Saulogon sa Banat News karong adlawa ang ika-32 ka tuig nga walay kahadlok nga pagbalita ug pagdalit og mga tinuoray nga mga impormasyon sa mga tigbasang Bisaya dinhi ning bahina sa nasud.

Natukod kini niadtong Agosto 22, 1994 pinaagi nilang anhing Dr. Jose “Dodong” Gullas ug kanhi Editor-in Chief ug Publisher Juanito V. Jabat , nahimong kinaham nga kasawo sa puto’g-sikwate sayo sa buntag sa atong mga lunlong tigbasa.

Mga tigbasa ug sumusunod nga gustong masayod sa mga panghitabo sa ilang palibot, gikan sa kahapsay ug kalinaw, politika, mga nobela,  pangamhanan, panglawas, paugnat sa kusog, kalingawan, balita sa mga artista ug mga personalidad ug mga panahon sa atong mga kolumnista  sa matag isyung gihisgotan sa publiko.

Sulod sa nakalabay nga 32 ka mga katuigan ginungtan kining Bisaya nga basahon dili lang sa mga Sugbuanon kondili lakip sa mga kasikbit nga mga probinsya sa Bohol, Siquijor, Negros ug bisan sa Leyte.

Apan dili sayun para maabot og 32 ka tuig kung dili pa tungod sa mga lunod-patay nga tigbasa sa Banat News.  Miagi kini og daghang mga pagsulay ug makadaghang higayon giusab para mohaom sa gipangita sa mga tigbasa niini ug sa mga tigpapatik sa ilang mga serbisyo ug produkto.

Usa sa mga dakong hagit nga giatubang karon mao ang pagsulbong sa digital age kay dinhi na nagsugod ang pagkatap sab og daghang mga fake news, misinformation, disinformation gamit ang social media.

Ang departamento sa editoryal niini nagpabiling ligdong ug matinud-anong gasunod sa estriktong mga patakaran pagmantala og mga balita pinasubay sa mga polisiya, mga balaod ug bisan sa kausabang gibase sa mga pamalaod sa nasud sa kasamtangang panahon.

Apan sa gihapon, naningkamot ang Banat News nga makasakay sa panahon, duna na sab kini kaugalingong digital form pinaagi sa Facebook ug naa sab ang digital isyu niini nga makita sa Philstar.com website.

Dako ang pagpasalamat nato sa mga advertisers niini nga pabiling misalig sa kredibilidad ning pamantalaan sa inadlaw-adlaw niining pagsabwag og impormasyon.

Ugmang adlawa, Agosto 24, mogawas ang mga greeting ads gikan sa mga nisuporta sa Banat News ika-32 nga anibersaryo niini.

Gikan diri sa Banat News ug sa ngalan sa tanang mga kawani niini, kauban ang mga igsuong pamantalaan ubos sa Philstar Group nga The Freeman, The Philippine Star, PangMasa, Pilipino Star Ngayon, Business World daghang salamat sa padayung pagsalig!