DBM nipagawas og P27.4-B nga tabang medikal

CEBU, Philippines — Nagpagawas ang Department of Budget and Management (DBM) og P27.410 bilyon nga pondo alang sa medical assistance sa mga kabus ug mga Pilipinong dili na makaya sa pinansyal nga gasto ang ilang pagpaospital ug pagpatambal.

Tumong sa pondo nga matabangan ang mga pasyente ug ilang pamilya nga naglisod sa pagbayad sa hospitalization, mga tambal, emergency treatment, professional fees ug uban pang panginahanglanon sa panglawas.

Ang pondo mosuporta sa Medical Assistance to Indigent and Financially Incapacitated Patients (MAIFIP) Program sa Department of Health (DOH), nga naghatag og tabang sa mga pasyenteng walay igo nga kapasidad sa pinansyal aron hingpit nga mabayran ang ilang pagpatambal ug uban pang serbisyong medikal.

Matud ni Budget Secretary Kim Robert C. De Leon sa usa ka press statement nga gitumong ang P27.410 bilyong pondo aron mahimong aktuwal nga tabang sa mga pasyente, ilabina sa panahon nga labing gikinahanglan.

Ang pinakadakong bahin nga P19.145 bilyon igahin sa CHDs aron suportahan ang paghatag og medical assistance pinaagi sa partner local government hospitals, pribadong mga health facility ug uban pang pasilidad panglawas sa tibuok nasud.

Samtang, P4.353 bilyon ang igahin alang sa mga DOH hospital sa Metro Manila ug mga rehiyon; P2.910 bilyon alang sa GOCC specialty hospitals sama sa Lung Center of the Philippines, National Kidney and Transplant Institute, Philippine Children’s Medical Center ug Philippine Heart Center; P950 milyon alang sa UP-PGH; ug P52 milyon alang sa Drug Abuse Treatment and Rehabilitation Centers.

Suma ni De Leon nga ang dakong bahin sa pondo nga moagi sa CHDs makatabang sa pagpalapad sa coverage sa MAIFIP ug pagduol sa medical assistance ngadto sa mga komunidad, dili lamang sa dagkong ospital. (BANAT NEWS)