State of calamity sa Zambales inirekomenda

IBA, Zambales, Philippines — Inirekomenda ng Provincial Disaster Risk Reduction and Management Council (PDRRMC) na isailalim sa state of calamity ang buong lalawigan ng Zambales kasunod ng malawakang pagbaha at matinding pinsalang dulot ng pinalakas na habagat at mga bagyong Luis at Maymay.

Nakapaloob ang rekomendasyon sa PDRRMC Resolution No. 02, Series of 2026, na pinagtibay noong Agosto 19 sa Provincial Capitol sa Iba, Zambales sa ilalim ng pamumuno ni Zambales Gov. Hermogenes “Jun” Ebdane Jr., chairman ng PDRRMC, at pinagtibay ni Provincial Disaster Risk Reduction and Management Officer Rolex Estella.

Batay sa PDRRMO Situational Report No. 23, umabot sa 5,770 pamilya o 17,317 indibidwal ang naapektuhan ng kalamidad. Kabilang sa pinakamalubhang pinsala ang pagkawasak ng Sta. Fe Bridge sa San Marcelino matapos tangayin ng malakas na agos ng ilog. Nasa 119 residente ng Sta. Fe ang napilitang lumikas dahil sa pagbaha at dinala sa mas ligtas na lugar.

Tinatayang nasa P390.22 milyon ang pinsala sa imprastraktura ayon sa Department of Public Works and Highways (DPWH), habang P966.25 milyon ang kinakailangang pondo para sa recovery, rehabilitation at reconstruction. Nasa P96.85 milyon ang pinsala sa mga flood-control infrastructure, habang P114 milyon ang kakailanganin para sa pagsasaayos at rehabilitasyon ng mga ito.

Sa agrikultura, umabot sa 810.48 ektarya ng palayan na pag-aari o sinasaka ng 1,007 magsasaka ang naapektuhan na nagresulta sa tinatayang P11.22 milyong pagkalugi.

Sa pinagsamang pangunahing datos sa ulat, lampas sa P487 milyon ang pinsala sa imprastraktura at flood-control facilities pa lamang, bukod pa sa pagkalugi sa agrikultura at iba pang sektor.