Mga poso sa Cebu City gipang-ayo sa DPS

CEBU, Philippines — Gipang-ayo sa Department of Public Services ang mga poso sa nagkadaiyang barangay sa Dakbayan sa Sugbo aron madugangan ang alternatibong tinubdan sa tubig sa mga residente ilabi na sa panahon sa tumang kainit ug posibleng epekto sa El Niño.

Sa taho sa Cebu City News, ang mga poso nga gipang-ayo sa DPS nahimutang sa Sitio Panagsama, Sitio Isla Mahilum, ug Sitio Panaghiusa sa Barangay Basak San Nicolas, Sitio Kanumay sa Barangay Pit-os, Sitio Labsalex, Sitio Bugnai sa Barangay Labangon, Sitio Ciwac ug Sitio Adelfa sa Barangay Bulacao.

Lakip usab sa giayo niadtong niaging buwan ang poso sa Sitio Gun Club sa Barangay Guadalupe, Sitio Villa Buena sa Barangay Kinasang-an, Sitio Upper Laguerta sa Barangay Busay, Sitio Tac-an Barangay Budlaan, Sitio Agay-ay sa Barangay Tejero, Sitio Laguna sa Barangay Basak Pardo, Sitio Kawayanan sa Barangay Lorega, Sitio Kabayoan sa Barangay Mambaling, Sitio Pailog sa Barangay Sambag 2, Purok 1, Purok 2 ug Purok 4 sa Barangay San Jose, Sitio San Roque sa Barangay Sambag 1, Sitio Riverside sa Barangay Sapangdaku, Sitio Upper Tore sa Barangay Inayawan ug ang duha ka poso sa Barangay Cambinocot ug Barangay Sudlon 2.

Matud sa DPS ang pag-ayo sa mga poso kabahin sa pagpangandam sa siyudad batok sa kakuwang sa tubig tungod sa huwaw.

Niadtong Abril 2026, adunay 386 ka poso nga mogana ang siyudad diin 195 niini nahimutang sa amihanang distrito ug 191 sa habagatang distrito nga magsilbing alternatibong tinubdan sa tubig kong maapektohan ang regular nga suplay sa Metropolitan Cebu Water District (MCWD) tungod sa El Niño.

Dili kini unang higayon nga gigamit sa siyudad ang maong pamaagi diin niadtong 2015 ubos sa DPS Patubig Project giayo ug giinstolar ang mga poso isip tubag sa kakuwang sa tubig tungod sa El Niño.

Gibutyag ni MCWD General Manager John DX Lapid nga kasamtangang nasinati sa Sugbo ang moderate El Niño ug gilaoman nga mosamot pa kini sa mosunod nga mga buwan.

Ang Philippine Atmospheric, Geophysical and Astronomical Services Administration (PAGASA) nipahibalo nga adunay pag-uwan-uwan hangtud sa Septiyembre ug Oktubre apan mahimong mokunhod ang pag-uwan sa pagsugod sa Nobiyembre ug Disyembre.

Samtang nagpadayon ang posibilidad sa taas nga panahon sa huwaw gipadayon sa DPS ang field operations aron maulian pa ang dugang nga mga poso ug masiguro nga adunay alternatibong kapilian ang mga residente sa ilang inadlaw-adlaw nga panginahanglan sa tubig. — BDB  BANAT NEWS