Child Online Safety and Protection Act kinahanglan na nga mapasar

CEBU, Philippines — Nanawagan si Senador Risa Hontiveros sa dinaliang pagpasar sa Child Online Safety and Protection Act, ang gipalapdan nga bersyon sa Anti-Online Sexual Abuse and Exploitation of Children (Anti-OSAEC) Law.

Kini aron makabaton ang gobyerno og lig-on nga legal nga mga himan batok sa nagkadaghang hulga sa Nihilistic Violent Extremism (NVE).

Ang balaudnon anaa na karon sa period of amendments sa Senado, samtang nakapasar na kini sa ikatulong pagbasa sa House of Representatives.

Matud ni Hontiveros, kinahanglan nga sertipikahan isip urgent ang balaodnon tungod sa makapaalarma nga pag-uswag sa NVE.    “This bill should be certified as urgent. NVE is an alarming new trend that needs immediate action,” matud sa senador sa usa ka press statement.

Sumala niya, ang pagpasa sa amyendadong Anti-OSAEC bill maghatag sa mga law enforcement agency sa gikinahanglang legal nga mga himan aron madakop ang mga suspek ug responsable sa maong mga buhat.

 “Huwag na nating hintayin na dumami pa ang school shooting bago umaksyon,” dugang niya.

Gipangulohan ni Hontiveros ang hearing sa Senate Committee on Women, Children, Family Relations, and Gender Equality bahin sa NVE, diin iyang gipadayag nga adunay talagsaong higayon ang Senado aron masirad-an ang mga kal-ang sa balaod nga mahimong magamit sa digital ecosystems.

 Matud niya, lahi man nga hulga ang OSAEC ug NVE, apan pareho silang mahimong mapadali pinaagi sa samang digital platforms, kakulang sa pagmonitor ug sayong pag-ila, ug pagpanalipod sa mga bata.

Si Hontiveros dugay nang nanguna sa paghimo og polisiya alang sa online safety sa mga bata. Siya ang usa sa mga niduso sa orihinal nga Anti-OSAEC Law ug padayon nga nanawagan alang sa hingpit ug matinud-anong pagpatuman niini pinaagi sa oversight sa Senado. (BANAT NEWS)