Myth Busted: Mga paniniwalang matagal nang mali

Nakakalabo ng paningin ang pagbabasa sa madilim na lugar.

Ang totoo, hindi direktang nakasisira ng mata ang pagbabasa sa madilim. Maaari lamang itong magdulot ng eye strain, pana­nakit ng ulo o pansamantalang pagod ng mata.

Kapag nilunok mo ang chewing gum, mananatili ito sa tiyan nang pitong taon.

Hindi ito totoo. Hindi natutunaw ang chewing gum tulad ng ibang pagkain, pero karaniwan itong dumaraan sa digestive system at inilalabas kasama ng dumi.

May bahagi ng dila na nakalaan lamang sa matamis, maalat, maasim at mapait.

Ang tinatawag na “tongue map” ay isang maling konsepto. Ang iba’t ibang bahagi ng dila ay nakakaramdam ng iba’t ibang panlasa, bagama’t maaaring magkakaiba ang sensitivity ng bawat bahagi.

Kailangang uminom ng walong baso ng tubig araw-araw ang lahat.

Hindi pare-pareho ang pangangailangan sa tubig ng bawat tao. Nakadepende ito sa edad, laki ng katawan, aktibidad, klima at pagkain. Ang “8 glasses” ay simpleng general guideline, hindi eksak­tong requirement para sa lahat.

Mas mabilis tumubo ang buhok kapag madalas itong gupitin.

Ang paggupit ay walang direktang epekto sa bilis ng pagtubo ng buhok dahil ang buhok ay tumutubo mula sa follicle sa ilalim ng balat, hindi mula sa dulo.

Ang tao ay gumagamit lamang ng 10 porsiyento ng kanyang utak.

Isa ito sa pinakasikat na scientific myths. Sa katotohanan, ginagamit natin ang maraming bahagi ng utak, kahit hindi lahat ay aktibo nang sabay-sabay.

Kapag nahulog ang pagkain sa sahig at napulot agad, ligtas pa rin itong kainin dahil sa “five-second rule.”

Hindi garantisadong ligtas ang pagkain dahil lamang mabilis itong napulot. Maaaring dumikit agad ang microorganisms sa pagkain depende sa uri ng pagkain, ibabaw at kondisyon ng sahig. (may karugtong)