Marcial ‘di lalaban sa Asian Games

MANILA, Philippines — Hindi lalaro si Olympic Games bronze meda­list Eumir Felix Marcial sa darating na 20th Asian Games sa Aichi-Nagoya, Japan sa susunod na buwan.

Ito ay dahil lalabanan ng 30-anyos na middleweight contender si American Omar Ulises Huerta para sa kanyang pang-walong professional fight sa Set­yembre 19 sa San Diego, California.

Nakatakda ang bo­xing preliminary rounds ng Aichi-Nagoya Asiad sa Set­yembre 21 kasunod ang semifinals sa Setyembre 29 at 30 at ang gold medal bouts sa Oktubre 2.

Puwersado si Marcial na idepensa ang kanyang suot na international middleweight title dahil sa kautusan ng World Bo­xing Council (WBC) kaya hindi siya makakalaban sa Asiad.

Huling sumalang si Marcial sa ‘Thrilla in Manila’ 50th Anniversary noong Oktubre 29, 2025 kung saan niya tinalo si Eddy Colmenares via majority decision.

Nauna nang isinama ang pangalan ng tubong Zamboanga City sa official lineup ng Philippine bo­xing team sa Aichi-Nagoya Asiad.

Ang iba pang miyembro ay sina Tokyo silver medal winners Nesthy Petecio at Carlo Paalam at 2024 Paris bronze medalist Aira Villegas.

Kung hindi lalaban si Marcial sa Aichi-Nagoya Asiad ay si pro fighter Weljon Mindoro ang ipapalit ng Association of Boxing Alliances in the Philippines (ABAP).

Nakatakdang harapin ni Mindoro si Mexican Carlos Ocampo sa Agosto 29 sa Los Angeles, California.

May 7-0-0 win-loss-draw ring record si Marcial na sumuntok ng bronze medal sa 2022 Olympics sa Tokyo, Japan kung saan binuhat ni lady weightlifter Hidilyn Diaz ang kauna-unahang Olympic gold medal ng bansa.

Dala naman ng 30-an­yos ring si Huerta ang 15-1-1 card kasama ang 13 knockouts.