Thea mihangyo sa mga botante
CEBU, Philippines — Nanawagan ang Kapuso actress nga si Thea Tolentino ngadto sa mga botante nga magtarong sa pagpili og mga tawo nga angayan suportahan sa umaabot nga eleksiyon.
Nahisgotan kini ni Thea human sa grabeng pagbaha sa nagkadaiyang dapit sa nasud.
Matud sa aktres nga kinahanglan nga mag-research ug sutaon ang background ug kwalipikasyon sa mga kandidato, imbes nga magbase lamang sa mga saad panahon sa kampanya.
“Tingnan niyo kung nasaan tayo ngayon. Hindi ba kayo nagagalit??” niya pa.
Mipahuway na sa indigay
Wala na’y plano ang beauty queen ug TV host nga si Joy Barcoma nga moapil pa og laing beauty pageant . Kontento na siya sa naangkon niya nga titulo kaniadto isip Miss Earth Philippines 2025. Alang kaniya, mahimo ra niyang ipadayag ug mapadayon ang iyang mga adbokasiya bisan wala na siya sa kalibotan sa indigay .
Engaged na!
Gikumpirmar ni Edward Barber nga engaged na siya sa iyang non-showbiz partner nga si Rikki. Nahisgotan ni Edward ang maong balita samtang nagsangyaw sa iyang mga kauban atubangan sa simbahan, diin siya nagsilbi isip pastor .Ang kanhi Pinoy Big Brother housemate malipayong mipaambit nga anaa na siya karon sa usa ka bulawanong relasyon uban kang Rikki.
Gidungog nga uyab
Wala moangkon , apan wala pud mo-deny si Bela Padilla sa giingong relasyon nila sa tawong ginganlan og Martin Tan. Kahinumdoman nga kapila na ka higayon nga nasigpatan sila nga nag-uban.
Labor leader nga inahan ni Sue, mipanaw
Nagbangotan ang aktres nga si Sue Ramirez tungod kamatayon sa iyang inahan nga si Concepcion “Chit” Dodd niadtong Lunes, Agosto 17, 2026.Gikumpirmar ni Sue ang makapasubo nga balita pinaagi sa iyang Instagram Stories diin iyang gipaambit ang litrato nilang mag-inahan.
Nailhan usab si Chit isip usa ka labor leader ug bise presidente sa Trade Union Congress of the Philippines (TUCP), usa ka pederasyon sa mga labor union nga nagdepensa ug nangulo sa katungod ug kaayohan sa mga mamumuo.
Sa pagkasulat niini nga balita, wala pa magpagawas og taho ang pamilya ni Sue bahin sa hinungdan sa pagkamatay ni Chit.
Kahinumdoman nga sa unang bahin karong tuiga , nangita si Sue og blood donors alang sa iyang inahan nga nangandam niadtong panahona alang sa open-heart surgery.
Pinay nataypan sa mga hurado sa “The Voice Australia”
Mikulit og dakong atensyon ang Pinay singer nga si Jeramie Sanico human gituyokan sa upat ka lingkoranan sa mga hurado sa reality singing competition nga “The Voice Australia.”
Sa wala pa naabot sa Australia si Jeramie, nahimo siya kaniadto nga contestant sa “Tawag ng Tanghalan” sa “It’s Showtime.”
Sa iyang Facebook page, gipaambit ni Jeramie nga ang iyang pag-apil sa “The Voice Australia” mao ang iyang pagbalik sa usa ka singing competition sa telebisyon sulod sa 10 ka tuig sukad sa iyang pagsalmot sa “TNT.”
“Since I’ve been in Australia, the only time I sang was in our churches, and they weren’t performances but renditions to God.I’ve been singing as well in my kitchen, bathroom and in front of my kids, so I really feel like I’m starting from ground zero,” suma pa ni Jeramie .
Bisan pa man sa dugay nga panahon nga wala siya nakasalmot sa usa ka singing competition, wala magduha-duha si Jeramie sa pagpakita sa iyang kusog sa blind audition sa “The Voice Australia” .
Gikanta niya ang “Because You Loved Me” ni Celine Dion, diiin nataypan kini sa mga hurado nga sila Melanie C, Ronan Keating, Richard Marx, ug Kate Miller-Heidke..
GGV mobalik sa kahanginan, i-ere sa GMA-7
Mobalik na ang talk show ni Vice Ganda nga “Gandang Gabi Vice” (GGV) karong September, ug palapdan ang pag-ere niini gumikan kay makita usab kini sa GMA-7 ug iWant.
Gikumpirma ni ABS-CBN chief operating officer for broadcast Cory Vidanes ang comeback sa maong programa atol sa bag-ohay lang nga pakigpulong niini sa shareholders .
Ang pagbalik sa “GGV” maoy usa sa mga dagkong entertainment projects sa ABS-CBN samtang nagpadayon ang partnership sa kompanya uban sa GMA Network.
Kahinumdoman nga ang karaan nga “Gandang Gabi Vice” kay nahunong niadtong Marso 2020.
- Latest
