Duha patay sa eskuylahan

CEBU, Philippines — Duha ang kumpirmadong patay, lakip ang gituohang suspek, samtang siyam pa ang nasamdan human sa pagpamusil sulod sa Ateneo de Zamboanga University (ADZU) Junior High School sa Barangay Tumaga, Zamboanga City, pasado alas 7:50 sa buntag niadtong Martes, Agosto 18, 2026.

Gikumpirma sa Philippine National Police (PNP) nga usa sa mga namatay ang Grade 10 nga estudyante, samtang ang gituohang suspek usa ka Grade 9 nga estudyante.

 Siyam usab ang gikatahong nasamdan base sa casualty count as of 2:27 sa hapon sa maong adlaw.

Sumala sa Police Regional Office-Zamboanga Peninsula (PRO-9), mitubag dayon ang mga kapulisan sa insidente ug nakigkoordinar sa school authorities ug ubang concerned agencies aron masiguro ang kaluwasan sa mga estudyante, faculty ug school personnel.

Sumala pang Interior and Local Government Secretary Jonvic Remulla, misulod ang Grade 9 nga gituohang suspek sa usa ka classroom sa ikaupat nga andana ug namusil, nga miresulta sa pagkamatay sa Grade 10 nga estudyante.

Human niini, misaka kini sa ikalimang andana ug milukso gikan sa building, hinungdan sa iyang pagkamatay.  Apan wala pa matino kung gipusil ba usab sa suspek ang iyang kaugalingon sa wala pa kini milukso.

Matud ni Remulla, adunay nakita nga samad sa ulo sa suspek, apan kinahanglan pa ang dugang nga imbestigasyon aron matino kung ang maong samad resulta ba sa pagpamusil o sa iyang pag-ambak gikan sa ikalimang andana.

Padayon ang imbestigasyon sa mga otoridad aron matino ang eksaktong sirkumstansya ug posibleng motibo sa pagpamusil, lakip kung giunsa pagkadala sa armas sulod sa eskwelahan.

Giingong nag-livestream ang suspek sa maong insidente pinaagi sa social media samtang siya nagbuhat sa krimen.

Base sa inisyal nga impormasyon nga gipagawas sa mga otoridad ang suspek nigamit og Glock .9mm pistol ug M16 assault rifle sa pagpamusil.

Sa opisyal nga pamahayag nga gipagawas ADZU, nakig-alayon na sila sa mga otoridad sa ilang imbestigasyon.

Sa laing bahin, mipahibalo ang Department of Education (DepEd) nga nag-coordinate kini sa mental health partners aron makahatag og Psychological First Aid ug psychosocial support sa mga estudyante, pamilya ug school personnel nga naapektuhan sa insidente.

Samtang, gitangtang sa Bureau of Customs (BOC) ang amahan sa suspek sa iyang posisyon isip district commander sa Port of Zamboanga Enforcement and Security Services.

Gikumpirma ni BOC Commissioner Ariel Nepomuceno nga gihimo ang maong lakang aron mapadayon ang impartial nga imbestigasyon kung adunay negligence sa pagdumala sa service firearm sa opisyal.

Gipasabot ni Nepomuceno nga samtang wala siyay direktang kalabotan sa gibuhat sa iyang anak, apan aduna siyay accountability sa giisyu og armas kaniya.

Gimando usab ni Nepomuceno ang mas lawom nga pag-review sa sistema sa BOC sa pag-isyu ug pagdumala sa firearms aron mapalig-on ang gun safety.

Samtang giawhag sa PNP ang publiko nga magpabiling kalmado ug saligan lamang ang mga opisyal ug beripikadong impormasyon.  Gipahinumdoman usab ang publiko nga dili magpakatap og opisyal nga report, litrato o video nga mahimong makahatag og dugang kabalaka samtang nagpadayon ang imbestigasyon.—  IBM BANAT NEWS