P4.2 milyong shabu nasakmit

CEBU, Philippines — Mokabat sa 697.4 ka gramong gituohang shabu nga adunay kinatibuk-ang gibana-banang standard drug price nga kapin P4.74 milyones ang nasakmit sa duha ka managlahing buy-bust operations sa Cebu City ug Talibon, Bohol sulod sa duha ka adlaw, diin tulo ka high-value individuals (HVI) ang nadakpan.

Sa Talibon, Bohol, duha ka HVI ang nadakpan human nasakmit ang mokabat sa 622.4 gramos nga gituohang shabu nga nagkantidad og P4,232,320, atol sa buy-bust operation sa Purok 6, Barangay Busalian, alas 5:27 sa hapon niadtong Agosto 14, 2026.

Ang mga nadakpan mao sila si Jonathan De los Reyes y Abarquez, alyas “Atan,” 42, ug Dennis Calma y Soliz, alyas “Dennis,” 46, parehong mga mananagat ug mga residente sa Barangay Busalian, Talibon.

Gipahigayon ang operasyon sa mga operatiba sa PNP Drug Enforcement Group Special Operations Unit 7 (PNP DEG SOU7), sa koordinasyon sa IMEG7, RIU7, RDEU/RSPU7, PDEA Regional Office 7 ug Talibon Municipal Police Station.

Gipangulohan ang operasyon ni Police Captain Jose Rodel Villaruel, ubos sa  ug nasakmit gikan sa mga suspek ang mga pinutos nga gidudahang shabu ug uban pang ebidensiya.

Sa laing operasyon sa Barangay Labangon, Cebu City, usa ka 30-anyos nga lalaki ang nadakpan human nasakmit ang mokabat sa 75 gramos nga gituohang shabu nga gibana-banang kantidad nga P510,000.

Ang nadakpan giila sa alyas nga “Mat-Mat,” 30 , usa ka estudyante sa kolehiyo nga residente sa Barangay Poblacion, Argao, Cebu.

Gipahigayon ang operasyon alas 9:10 sa buntag niadtong Agosto 15, 2026, sa Balaga Street, Barangay Labangon, sa mga operatiba sa Regional Police Drug Enforcement Unit 7 (RPDEU7) nga gipangulohan ni PCPT Ciriaco L. Peralta III, ubos sa pagdumala ni PLTCOL Rodel S. Ban-o, sa koordinasyon sa PS10 sa Cebu City Police Office ug PDEA-7.

Nasakmit sa operasyon ang pipila ka paketeng gidudahang shabu, buy-bust money ug ingon man usa ka gray sling bag nga giingong gigamit sa pagbutang sa gituohang ilegal nga droga.

 Ang mga dinakpan anaa sa kustodiya sa kapolisan samtang giandam ang mga kaso alang sa giingong paglapas sa Sections 5 ug 11, Article II sa Republic Act 9165, o Comprehensive Dangerous Drugs Act of 2002.