Wa ka remit, gitabangag pusil
CEBU, Philippines — Patay ang usa ka 28-anyos nga lalaki human giingong gipusil sa upat ka mga mamumuno diha sa Barangay Greenhills, San Fernando, Cebu, mga alas-11:30 sa gabii niadtong Huwebes, Agosto 20, 2026.
Ang biktima giila nga si Vincent Repaso Romo, residente sa Barangay Sangat, San Fernando, Cebu. Base sa inisyal nga imbestigasyon sa San Fernando Municipal Police Station, sakay sa iyang motor Romo ug nihunong sa maong dapit ug nilingkod.
Wala pa matino kung nganong mikanaog ang biktima sa iyang motorsiklo, apan didto na giingong nangabot ang upat ka mga gikatahapan ug kalit siyang gipaulanan og bala. Nakadagan pa siya og pila ka metros apan nahagba sa unahan.
Gidala siya sa mga mirespondeng mga sakop sa Municipal Disaster Risk Reduction and Management Office (MDRRMO) sa tambalanan, apan gideklarar siyang dead on arrival.
Samtang nagpadayon ang imbestigasyon, usa sa upat ka giilang suspek ang nadakpan sa hot pursuit operation alas-11 sa buntag niadtong Agosto 21 sa Barangay Sangat.
Ang nadakpan giila nga si Christian Dane Enad Galo, 29, residente sa maong barangay. Padayun pang gipangita ang laing tulo niya ka mga kauban, lakip ang duha ka lalaki nga 26 ug 29 anyos ug usa ka lalaki nga giila lamang sa alyas nga “John.”
Sa follow-up investigation sa kapulisan, duha sa mga suspek ang giingong nagpuli-puli sa pagpusil kang Romo, samtang ang duha pa nagsilbing lookout.
Gituohang personal nga panagbangi ang motibo sa krimen, nga giingong nalambigit sa transaksiyon sa ilegal nga droga. Matud sa kapulisan, adunay giingong utang si Romo ngadto sa mga suspek tungod sa kakulang sa remittance o “batal.”
Padayon ang hot pursuit operation sa kapulisan alang sa pagkadakop sa tulo pa ka suspek nga nakapalayo human sa insidente.— IBM BANAT NEWS
- Latest
