Lightsout nakasagunson og daog

CEBU, Philippines — Ang Lightsout mipayaka sa Mix Hoopers, 88-83, alang sa ikaduha nilang sunod-sunod nga daog sa D'Generals Basketball Club Season 4:Camaraderie Cup didto sa Aulga Citi Sports sa Barangay Lawaan II, dakbayan sa Talisay.

Si Gene Bayonita maoy nangu sa Lightsout uban ang 23 puntos, upat ka rebounds, ug tulo ka assists. Nakakuha siya og dakong suporta gikan ni Brylle Sanchez nga mitimbre og 15 puntos, upat ka rebounds, ug lima ka assists.

Sa laing bahin, ang Brotherhood, Venom Vipers, ug Still&Motion mikadlit sa una nilang daog.

Sila si Kent Lim ug Jerry Singson nagkumbinar og 37 puntos, 12 ka rebounds, ug siyam ka assists aron ibandera ang Brotherhood ngadto sa 92-77 nga paglampaso sa Blitz.

Ang Venom Vipers mikastigo sa Rise Up, 79-57, samtang ang Still&Motion dali nga namawi sa miagi nilang kaparotan ug gipahimungtan sa ilang kapungot ang Go Hard, 71-64.

Si Alloy Sayson ang bida sa Vipers bitbit ang 25 puntos, upat ka rebounds, ug upat ka assists. Mihimo sab og kasikas si Roy Daclan uban ang 14 puntos, walo ka rebounds, ug tulo ka assists.

Sila si Doms Arcenal ug Bernard Gingoyon maoy nanghugyaw sa habig sa Still&Motion. Si Arcenal miposte og double-double nga 17 puntos ug 10 ka rebounds nga iyang gisukipan og tulo ka assists samtang si Gingoyon mipupo og 17 puntos, tulo ka rebounds ug upat ka assists.