Road Warriors silat sa FiberXers

MANILA, Philippines — Inspiradong naglaro ang NLEX para kay injured balik-import DeQuan Jones.

Ngunit mas determinado ang Converge na makasampa sa quarterfinal round.

Nagtuwang sina balik-import Cameron Clark, Juan Gomez de Liaño at Justin Arana sa dulo ng fourth quarter sa 112-110 pagtakas ng FiberXers sa Road Warriors sa second round ng PBA Season 50 Governors’ Cup kahapon sa Smart Araneta Coliseum.

Humakot si Clark ng 37 points at 12 rebounds para sa 5-4 baraha ng Converge kasama ang back-to-back wins at solohin ang third spot sa Group A, habang may tig-19 markers sina De Liaño at Arana.

“I think we need more adjustment on our defense. Imagine they don’t have an import but it was a close game,” ani coach Delta Pineda.

Binanderahan ni point guard LJ Gonzales ang NLEX, may 7-2 marka ngayon, sa kanyang 23 points at may 19 at 17 markers sina Robert Bolick at Schonny Winston, ayon sa pagkakasunod.

Itinayo ng Road Warriors ang isang 12-point lead, 30-18, sa first period bago naagaw ng Fiber­Xers ang 103-99 abante sa hu­ling dalawang minuto ng fourth quarter.

Ilang beses idinikit nina Bolick, Winston at Gonzales ang NLEX, ang huli ay sa 106-108 sa huling 14.9 segundo.

Kasunod nito ang apat na sunod na free throws ni De Liaño para ilayo ang Converge sa 112-106 sa nalalabing 3.2 segundo.

Ang four-point shot ni Gonzales ang muling nag­lapit sa Road Warriors sa 110-112 kasama ang foul ni Calvin Abueva ng Fi­berXers sa huling 0.6 segundo.

Magkakaroon ng 17-day break ang PBA sa Agosto 15 hanggang Oktubre 6 para bigyang-daan ang kampanya ng Gilas Pilipinas sa FIBA Basketball World Cup 2027 Asian Qualifiers at sa 20th Asian Games.

Sa Oktubre 7 magbabalik ang mga aksyon sa banggaan ng NLEX at guest team Macau at upakan ng nagdedepensang TNT Tropang 5G at Terrafirma sa Ninoy Aquino Stadium.