Ilegal nga mga sigarilyo gipangguba

CEBU, Philippines — Gipangguba pinaagi sa shredding ang mga lokal nga ilegal nga sigarilyo nga nasakmit sa Bureau of Internal Revenue (BIR) sa Sugbo nga adunay tax liability nga nikabat ngadto sa P240.64 milyones.

Gipangulohan ni Department of Finance (DOF) Secretary Frederick Go ang destruction activity sa BIR Revenue Region No. 13, Central Visayas kagahapon.

 Matud ni Go, resulta kini sa serye sa enforcement operations batok sa ilegal nga paghimo, pagtipig ug pag-apod-apod sa sigarilyo sa nagkadaiyang lugar sa Sugbo.

Si BIR-13 Regional Director Douglas Rufino nga lokal nga gihimo sa Sugbo ang mga nasakmit nga sigarilyo.

Nasakmit usab ang mga makina, hilaw nga materiyales, packaging materials ug ubang gamit sa produksiyon.

 Ang mga operasyon sa Regional Strike Team gikan Oktubre 2024 hangtud sa Hunyo 2025 niresulta sa total nga tax liability, lakip ang penalties nga P240,641,547.71.

Pito ka indibidwal ang nadakpan sa operasyon ug nakapiyansa kini alang sa ilang temporaryong kagawasan.

Matud ni Rufino, gisusi usab sa mga awtoridad ang posibilidad nga adunay sindikato luyo sa operasyon apan wala pa’y ebidensya nga nag-ila sa lokal o langyaw nga sindikato.

Gawas sa mga sigarilyo, giguba usab ang mga nakompiska’ng makina pinaagi sa pag-disassemble ug pagputol aron dili na magamit pag-usab.

Samtang si Go nagkanayon nga ang pagguba sa mga kontrabando maoy paagi aron masiguro nga dili na kini makabalik sa merkado ug mapanalipdan ang kita sa gobiyerno ug panglawas sa publiko.

Samtang, si Bureau of Customs-Cebu District Collector Czae de Guzman nagkanayon nga padayon nga palig-onon sa BOC ang monitoring sa mga pantalan ug entry points aron mapugngan ang smuggling ug ubang ilegal trade.

Matud niya, padayon usab ang koordinasyon sa BOC sa BIR, National Bureau of Investigation ug ubang ahensiya sa gobiyerno.

Sa laing bahin, si Go nagkanayon usab nga ang 11 ka container nga smuggled, unregistered, undeclared ug unauthorized cigarettes nga iyang nasusi sa BOC anaa pa sa kustodiya sa ahensiya ug gipaubos sa legal nga proseso subay sa Anti-Agricultural Economic Sabotage Act. Si De Guzman nipadayag nga dili pa matino kong ang mga hilaw nga materiyales nga gigamit sa paghimo sa lokal nga ilegal nga sigarilyo gipalusot o legal nga nakasulod sa nasud. (BANAT NEWS)