Pagpatuman sa proyekto batok sa baha paspasan sa DPWH

CEBU, Philippines — Paspasan sa Department of Public Works and Highways (DPWH) sa pagpatuman sa mga proyekto batok sa baha sa mga dakbayan sa Sugbo ug Mandaue aron mapamenos ang kabug-at ug kadugayon sa pagbaha sa mga lugar nga kanunay’ng maapektohan.

Kagahpon si DPWH Secretary Vince Dizon nisusi sa mga flood-prone areas sa duha ka siyudad kauban ang opisyales sa DPWH-7, Cebu Governor Pamela Baricuatro ug opisyales sa lokal nga kagamhanan sa Mandaue.

Sa Cebu City, gisusi ni Dizon ang Barangay Kinasang-an nga nahimong catch basin sa tubig-ulan gikan sa kabukiran ug ang pig-ot nga creek dapit sa N. Bacalso Avenue nga giila nga usa sa mga bottleneck sa pag-agos sa tubig baha.

Matud ni Kinasang-an Barangay Captain Susan Enriquez nga nakapasamot sa pagbaha ang pagputol sa mga kahoy sa upland barangays ug sayop nga paglabay sa basura.

 Sa Mandaue City, gisusi ni Dizon ang Orel Creek sa Barangay Banilad nga giila nga usa sa mga hinungdan sa pagbaha sa A.S. Fortuna Street panahon sa kusog nga ulan.

Matud ni Mandaue City Mayor Jonkie Ouano nga unom ka dagkong flood-prone areas ang giila sa siyudad lakip nga gilangkuban sa A.S. Fortuna, LH Prime, UN Avenue, A.C. Cortes Avenue ug M.L. Quezon.

Gikataho nga aduna na’y pipila ka nahuman nga proyekto lakip ang waterway nga nagkonektar sa Rolling Hills ngadto sa Orel Creek.

Si Ouano nagkanayon nga nakatabang kini sa pagpamubo sa panahon sa pagbaha sa A.S. Fortuna diin ang tubig sa niaging kusog nga ulan nikunhod sulod sa 30 minutos.

Apan dili dayon mawagtang ang pagbaha tungod sa daghang tubig nga gikan sa kabukiran sa Cebu City ug sa padayong urbanisasyon.

Lakip sa dagkong proyekto sa Mandaue ang pumping station ug floodgate sa A.C. Cortes Avenue nga gikatakdang tukoron sa 2027.

Si Dizon nagkanayon nga ang floodgate mopugong sa backflow sa tubig sa dagat ngadto sa Mandaue panahon sa high tide samtang ang pumping station maoy mopagawas sa tubig baha ngadto sa dagat.

Gisusi usab ni Dizon ang flood wall project sa Villa del Rio sa Barangay Bacayan, Cebu City diin hapit na kini mahuman. (BANAT NEWS)