P3.4 milyong sigarilyo aksidenteng nasakpan

CEBU, Philippines — Mokabat P3.4 milyones nga kantidad sa mga kontrabandong sigarilyo ang aksidenteng nadiskubrehan sa kapolisan atol sa hot-pursuit operation sa usa ka insidente sa pagpamusil diha sa Barangay Tuyan, Naga City, Cebu pasado alas-12 sa udto niadtong Miyerkules, Oktubre 7.

Ang operasyon gihimo sa Naga City Police Station ubos sa pagpanguna ni Police Lieutenant Colonel Dexter Calacar alang sa pagpangita sa suspek sa pagpamusil sa usa ka Jordanian national nga nailhan sa alyas nga “Malek” sa maong barangay niadtong Oktubre 6.

Samtang nagsusi ang mga pulis sa balay sa ilang gipangita nga suspek, nakamatikod sila sa mga kahon nga puno sa sigarilyo nga nakasansan sa kilid sa balay sa silingan.

Gisusi sa mga pulis ang mga kahon ug nakita  nga adunay 33 ka kahon nga adunay kinatibuk-ang 210 ka reams sa nagkalain-laing klase sa sigarilyo nga pulos kontrabando, o walay mga permit sa gobiyerno.

Lakip niini ang 20 ka kahon sa King Pen Menthol Cigarettes, 13 ka kahon sa Canon Menthol Cigarettes, 50 ka reams matag usa sa Canon, Patron Black Menthol, Axis Menthol ug Walter Red cigarettes, ug 10 ka reams sa Harvey Menthol Cigarettes.

Dihang gipangutana sa kapolisan ang babaye nga nagpuyo sa maong balay kung aduna ba siyay permit o dokumento alang sa pagbaligya sa mga sigarilyo, wala siya’y napakita sa gikinahanglang papeles.

Tungod niini, gikumpiska sa mga pulis ang mga sigarilyo nga ilang gibana-banang mokabat sa P3.4 milyones ang kantidad.

Matud sa babaye, wala siya kahibalo kung asa gipalit o gikan asa ang mga sigarilyo nga panag-iya kini sa iyang live-in partner nga giila sa kapolisan nga si Kenhar Arasa, nga wala didto sa ilang balay sa panahon sa pagkumpiska.

Gidala ang tanang nakumpiskang sigarilyo sa Naga City Police Station alang sa tukmang disposisyon.

Samtang gipangita pa sa kapolisan ang duha ka tawo nga may kalabotan sa managlahing insidente.

 Ang usa giingong nalambigit sa pagpamusil sa Jordanian national, samtang ang usa mao si Arasa nga giingong tag-iya sa mga sigarilyong nakumpiska.

Gidayeg ni Police Colonel Abubakar Mangelen Jr. ang mga personnel sa Naga City Police Station tungod sa pagkakumpiska sa mga sigarilyo ug gipasiugda ang panginahanglan sa pagbantay atol sa mga operasyon sa kapolisan.—   IBM BANAT NEWS