2 BuCor exec sibak sa ‘missing’ P6 milyong trust fund ng CIW

MANILA, Philippines — Iniutos ni Bureau of Corrections (BuCor) Director General Gregorio Pio P. Catapang Jr. ang pagtanggal sa pwesto ng dalawang commissioned officer mula sa Correctional Institution for Women (CIW) upang bigyang-daan ang imbestigasyon sa mga umano’y ano­malya na kinasasangkutan ng trust fund ng persons deprived of liberty (PDLs).

Sa isang pahayag, pinangalanan ang mga sinibak na sina CSSupt. Daisy Sevilla-Castillote, Superintendent ng CIW, at CSSupt. Marites Lebardo, Deputy Superintendent for Administration ng CIW. Ang dalawa ay magrereport sa Office of the Deputy Director General for Administration (DDGA) sa National Headquarters sa Muntinlupa City. 

Si Corrections Officer 2 Bianca Ramos, na siyang PDL Trust Fund Officer, ay absent without leave (AWOL) simula noong Hulyo 29. Pinaghahanap na ito ng Muntinlupa Police Station.

Samantala, si CT/SInsp Lariza Martin, director ng Reception and Diagnostic Center NHQ, na itinalaga bilang Acting Superintendent ng CIW.

Inatasan din ni Catapang si Mr. Edgardo Virtudazo, head ng Internal Audit Service Unit, na magsagawa ng internal audit hinggil sa umano’y maling paghawak ng mga trust fund. Kabilang sa audit na ito ang pangangalap at pag-verify nang lahat ng kaugnay na detalye, umiiral na impormasyon, at mga ulat na may kaugnayan sa isyu.

Bukod pa rito, ang Directorate for Intelligence and Investigation, na pinamumunuan ni Atty. Ferdinand V. Balduman, na inatasang magsagawa ng parallel investigation upang matukoy ang lawak ng kasalanan ng mga dating at kasalukuyang opisyal ng CIW.