Rider nalambos sa poste patay
CEBU, Philippines — Namatay diha-diha dayon ang usa ka 25-anyos nga call center agent human mabangga ang iyang gimanehong Yamaha Aerox sa usa ka taxi sa Osmeña Boulevard, atbang sa Abellana Police Station 2, Cebu City, sayo sa kaadlawon niadtong Lunes, Agosto 10, 2026.
Ang biktima mao si Ariel Tenedo, 25, residente sa Barangay Sapangdako, Cebu City. Nahitabo ang aksidente alas 3:57 sa kaadlawon sa intersection sa Osmeña Boulevard ug R. Landon Street.
Sumala sa inisyal nga imbestigasyon sa Traffic Enforcement Unit (TEU) sa Cebu City Police Office, nagkabanggaanay ang duha diha gyud sa eskina samtang paliko ang taksi unya ang motor kusog kaayo ang dagan nga nagsubay sa Osmeña Boulevard.
Ang 55-anyos nga taxi driver, residente sa V. Rama Avenue, Cebu City, nagmaneho og Toyota Vios taxi gikan sa Fuente Osmeña Circle padulong sa R. Landon Street.
Mimenor ang taxi sa intersection apan nasangit gyud sa bumper niini ang motor. Base sa inisyal nga imbestigasyon, kusog ang dagan ni Tenedo hinungdan sa pagkapusgay sa atubangan sa taksi samtang nalahus kini ug iyang motor.
Si Tenedo nalagpot ug nalambos sa lamp post ayha pa kini nalabay pabalik sa karsada ug wala na makabarug pa.
Matod sa mga kauban ni Tenedo, gikan sila sa Colon ug padung na manguli sa dihang nahitabo ang aksidente. Miingon usab sila nga nakainom sila og gamay.
Gikustodiya sa TEU ang 55-anyos nga taxi driver samtang giandam na ang pagpasaka og kasong reckless imprudence resulting in homicide batok niya. (BANAT NEWS)
- Latest
