Golaman bagong online booking platform sa golf

MANILA, Philippines — Isang mahalagang pangyayari sa golf sa Pilipinas at dagdag-tulong sa sports tourism.

Iyan ang Golaman — ang opisyal na online booking platform na sumasaklaw sa 79 na golf course sa iba't ibang panig ng bansa, kabilang ang Manila, Tagaytay, Clark at Subic, Batangas, Cebu at Davao.

Matapos ang halos isang taong pagbuo ng kumpanyang PGRR (Philippine Golf Resort Reservations) na pinamumunuan ng mga Koreano, maaari nang i-download ang makabagong app na ito mula sa Google Play Store.

Inaasahang magiging ganap na operational ito online sa Setyembre 15, ayon kay PGRR CEO Aaron Kim na dumalo sa media launch ng app noong Biyernes sa Philippine Sports Commission (PSC) House.

Ang nasabing online booking app ay makakatulong sa Pilipinas bilangisa na namang major golfing destination sa Asya at kahanay ang Vietnam, Thailand, Japan, South Korea at Singapore.

Dumalo rin sa paglulunsad ang mga major stakeholders na pinamumunuan nina PSC Chairman Patrick Gregorio, National Golf Association of the Philippines (NGAP) President Al Panlilio at Secretary-General Bones Floro, Department of Agriculture Undersecretary Arrey Perez at Tourism Promotions Board COO Marga Nograles.

“I think this program will click. We’ve been talking about this for the last 12 months and now it’s here. It’s a perfect collaboration,” wika ni Gregorio.

“I’m sure they will. If we push sports tourism, we push sports development,” dagdag ng PSC chief na chairman din ng Philippine Sports Tourism-Inter Agency Committee.

Nasa okasyon din ang mga kinatawan ng golf courses Lakewood, Pradera, Subic International, Mimosa Plus, South Pacific, Philippine Navy, Villamor at Mt, Malarayat; at Philippine Airlines, Cebu Pacific, Sunlight Air, Jeju Air, Singapore Airlines, Korean Air at Hana Tour.

“Golaman is not simply a booking platform but a launch of the national golf tourism initiative,” wika ni Panlilio.

“And this will reposition our country as a premiere golf destination. This is a national effort that is designed to showcase the Philippines to the rest of the world. Golf tourism creates jobs and creates business. This will attract more tourists to our country,” dagdag nito.