Dalan nahulpa tungod sa leak sa tubig
CEBU, Philippines — Usa ka bahin sa Salinas Drive sa Barangay Lahug sa Dakbayan sa Sugbu kalit nga nahulpa human nakankan ang yuta sa ilawom sa maong karsada kagahapon sa hapon, Agoston 7,2026.
Ang mga residente ug mga nakakita sa bangag daling nipahibalo sa mga otoridad hinungdan sa pagresponde sa Special Rescue Squad sa Cebu City Disaster Risk Reduction and Management Office (CCDRRMO).
Gidudahan nga ang posibleng hinungdan niini nga naay nag-leak nga tubog sa tubig sa JE Hydro nga konektado sa suplay sa Metropolitan Cebu Water District (MCWD).
Sa pasiunang assessment sa CCDRRMO, nakita nga naguba o nagtulo ang tubo sa tubig nga maoy hinungdan sa pagkabanlas sa yuta ilawom sa karsada ug nakamugna og lungag sa dalan.
Giklaro ni Konsehal Dave Tumulak kinsa tsirman sa Cebu City Disaster Risk Reduction and Management Council (CCDRRMC) nga dili sinkhole ang nabuslot nga dalan.
Matud pa niya, nakankan ang ilawom sa dalan tungod sa kusog nga pressure sa tubig gikan sa nag-leak nga tubo. Kung di na ayuhon dayun lapad nga bahin sa dalan ang mahugno.
Tungod sa maong panghitabo, mipagawas sab og Emergency Water Service Interruption advisory ang JE Hydro ug gipawong ang JE Hydro-Busay pump sa alas 5:33 sa hapon, ablihan lang kini alas 3:00 sa kaadlawon sa Sabado, Agosto 8.
Ang mga barangay nga makasinati og hinay nga pressure hangtod sa walay agas mao ang Busay, Nivel Hills, PBN, Plazaville, Maracas, Lahug, Gorordo, Escario, Capitol Site, Jones Area, Camagong, Ramos, Sambag 1 & 2, Calamba, V. Rama, Labangon, B. Rodriguez, Banawa, Jakosalem, San Antonio, Echavez Street, Ayala, Hipodromo, Camputhaw, Archbishop Avenue, ug uban pang mga bahin sa dakbayan. — IBM BANAT NEWS
- Latest
