Cebu City nipalapad sa boarder control batok sa ASF

CEBU, Philippines — Gipalapdan ni Cebu City Mayor Nestor Archival, Sr. ang border control ug quarantine measures batok African Swine Fever (ASF) pinaagi sa pagluwat sa Executive Order No. 93 nga ipatuman sa Cebu City Department of Veterinary Medicine and Fisheries (DVMF) aron malikayan ang sakit sa mga baboy sa siyudad.

Sayo pa, si Archival niluwat sa EO 86 nga nagdili sa paggawas ug pagpasulod og mga binuhing baboy tungod sa hulga sa ASF.

Base sa taho sa DVMF, gipamatay na ang 19 ka baboy nga apektado sa ASF diin siyam niini ang nagpositibo diha sa Barangay Quiot.

Ubos sa EO 93, gitahasan ang DVMF sa pag-establisar og temporary veterinary inspections ug quarantine stations, pag-inspeksiyon sa mga sakyanan, kargamento ug mga dokumento, pagkompiska sa mga binuhing baboy kong wala makatuman sa mga biosecurity requirements.

Makig-alayon sab ang buhatan sa mga silingang lokal nga kagamhanan alang sa pagpatuman sa restrictions.

Lakip sa gitahasan ang mga barangay kinsa obligado nga motubag sulod sa 24 oras sa bisan unsang hangyo gikan sa DVMF o ASF Task Force diin kinahanglang mohatag og logistics ug operational support aron mapadali ang mga aksyon batok sa ASF.

Gipalapdan usab sa maong EO ang disease surveillance diin gitahasan ang mga mag-uuma sa baboy, livestock traders, operators sa slaughterhouse, transporters, meat dealers ug mga opisyal sa barangay nga mo report sa mga posibleng kaso sa ASF ug palig-onon ang epidemiological investigations, laboratory sampling ug animal health monitoring.

Giawhag sa mayor nga motug-an kong nataptan og ASF ang binuhing hayop ug makig-alayon sa DVMF alang sa inspeksiyon.

Likayan usab ang manghulga o manghadlok sa mga inspector og mga kawani sa DVMF.

 Ginadili usab ang ilegal nga pagbiyahe sa regulated commodities ug pagpameke sa mga permit ug sertipikasyon.

Ang makapalas sa mga lagda sa EO mamahimong mag-atubang og administratibong kaso lakip na ang pagkompiska, pagsuspenso o pagbakwi sa mga hayop, permit ug lisensiya.

Gipahinumduman ni Archival nga balido gihapon ang mga biosecurity requirements nga kinahangla’ng maangkon sa tanang hog raisers ug meat establishment owners ang Recognition of Active Surveillance sa African Swine Fever ug Certificate of ASF-Free Status nga giisyu sa Provincial Veterinary Office kong ang hayop gikan sa laing lugar.  BDB BANAT NEWS