Makasulbad o makadugang sa problema?

Nakaani og managlahing reaksiyon ang estriktong pagpatuman sa Banilad-Talamban (BanTal) Discipline Zone. Dunay nakauyon ug duna usay nakasaway kay hasol lagi kuno matud nila. Sugod niadtong niaging adlaw, gipatuman na ang hugot nga pagpanakop sa mga traffic violators ug ubay-ubay gyud ang mga nadakpan.

Angayan nga masayran sa tanan ang mga punto nga gilatag sa Cebu City LGU pinaagi sa Cebu City Transportation Office (CCTO). Unahon nato ang mga single nga motorsiklo nga hilig kaayo og lusot-lusot bisan asa ang agi—dili na kana mahimo karon sa BanTal area. Gikinahanglan nga mosubay ang mga motor sa ilang lane ug dili molapas sa blue line aron dili makasulod sa inner lane nga higpit nga gidili. Nuon, ang motorcycle lane dili nila exclusive tungod kay mahimo gihapon nga moagi ang ubang hinayan nga sakyanan.

Sa mga public transportation usab, apil na ang Traditional Public Utility Jeepney (TPUJ) ug Modern Public Utility Jeepney (MPUJ), didto ra gyud sila pwede mohunong sa gihimong road lay-by. Kinahanglan nilang isulod ang sakyanan sa dapit nga gihimoan og yellow diagonal lines diin didto ra gyud mokanaug ug mosakay ang mga pasahero. Dili na mahimong mohunong bisan asa daplin sa karsada kay dakpon gyud. Dili na usab mahimo ang mindset sa mga pasahero nga "door-to-door" ang naandan, tungod kay sa designated loading ug unloading zones ra gyud pwede ang sakay ug naog.

Samtang sa mga pedestrian, gikinahanglan nga didto ra sa pedestrian lane ug skywalk moagi tungod kay kadtong mosupak, aw, dakpon dayon sa mga anti-jaywalking team! Gitumong kini alang sa kaluwasan sa tanan aron dili na makigpatentero sa mga sakyanan nga posibleng ikaligsa pa.

Dili mahimong baliwalaon ang lagda sa dakbayan tungod kay kun dili man gani ma-settle ang violation, isang-at man kini sa piskalya ug posibleng malutsan og bench warrant ang mga violators. Kutob nalang sa pagbagotbot ang uban, apan kay mao naman kini ang gipatuman sa kagamhanan, mas maayong sundon nalang. Tungod kay bag-o pa, naglisod pa sa pag-adjust ang mga tawo, apan sa ngadto-ngadto maanad ra usab ang tanan sa maayong pamatasan kay madisiplina na man.  Apan sa laing bahin, seguro dunay gikinahanglan nga i-improve ang habig sa LGU. Ilabi na ang mga road lay-by nga mas maayong patas-an aron maigo ang ubay-ubay nga sakyanan. Sa tinuod lang, dili gyud maigo sa kasamtangang lay-by kon magdungan ug magpundo na ang daghang pasahero nga mag-atang ug mga sakyanan. Matud sa uban, nagsamok-samok lang kuno ug nakapasamot sa problema ang discipline zone. Apan gikinahanglan kining suwayan ug hatagan og tsansa—basin diay maghatag kini og solusyon sa kahuot sa trapiko. Sa tinuod lang, ang road widening ra gyud unta ang gidahom nga makasolbad sa dugay nang problema sa maong dapit, apan kay imposible pa man kini sa pagkakaron, kinahanglan kitang mangita og alternatibo. Alang sa mga mabuot nga lungsanon, dili na kinahanglan nga maghulat pa og discipline zone kon kita mismo dunay self-discipline ug self-respect aron dili mahimong law-breaker. Sayon ra gyud ang pamaagi aron dili madakpan: ang pagtuman lamang sa balaod.